翻译:惡之華/唐璜在冥府

唐璜在冥府
作者：夏爾·皮耶·波德萊爾
譯者：木枚

本作品收錄於《Translation:惡之華》

唐璜喺冥河涉水而下，
將擺渡錢畀卡隆嗰陣，
個暗沉嘅乞兒，目光如安提西尼自誇
捉實晒兩邊船槳，雙手懷恨。

有女人雙乳揈揈，衣不蔽體，
喺漆黑嘅天空下蠕動，
況如一大班供品要活祭，
似牛叫嘅呻吟流連喺身後嘅半空。

斯加拿爾笑住要人畀佢薪資，
同時亡靈喺岸邊遊走，
畀當路易用顫抖嘅手指示意，
有個𡃁仔笑佢老豆白雪雪嘅額頭。

貞潔消瘦嘅艾菲華抽泣又哀痛，
其不忠嘅舊情人，同佢一齊。
佢想喺情人面上擠出銘心嘅笑容，
好令佢諗起當初甜蜜嘅山盟海誓。

個硬漢一身裝甲，氣度不凡，
操住船舵，喺黑水劃破波瀾，
但拄住長劍嘅梟雄氣定神閒，
怔怔對住亂流，但不屑一盼。