松巖先生續集/獨樂曲
獨樂八曲幷序
编辑巖主謀拙萬事，才短六藝，寓形世間，宅心物外。黃墨之暇，會有嘉辰之興，可詠之事，發以爲歌，調以爲曲，揮毫題次擬爲樂府。雖嗚嗚無節，聽以察之，則詞中有意，意中有指，可使聞者感發而興嘆也。
有時松月滿庭，春花撩人，佳朋適至，則酌罷芳樽，共憑巖軒，高歌若干章，手之舞足之蹈，幽人之樂足矣。
考槃之歌，負薪之謠，不知孰優孰劣也。忘懷得失，以樂其志，甘原思之貧，而唾子張之祿；臥羲皇之北窓，酣華胥之高枕，富貴何能淫，威武不能奪。
凡日用喜怒哀樂之發，憂憾悲歡之事，一於此寬焉。査滓之滌，邪穢之蕩，不期而然。
古人云『歌多出於憂思。』此亦發於余心之不平。而朱文公曰『詠歌其所志，以養性情。』至哉斯言！心之不平而有是歌；歌之暢志而養其性。
噫！松窓數般之曲，豈無少補於風朝月夕之動蕩精神乎？余是以，戲有是說焉。
太平聖代田野逸民〈再唱〉
耕雲麓釣煙江이이밧긔일이업다。
窮通이在天ᄒᆞ니貧賤을시름ᄒᆞ랴？
玉堂金馬ᄂᆞᆫ내의願이아니로다。
泉石이壽域이오草屋이春臺라。
於斯臥於斯眠俯仰宇宙流觀品物ᄒᆞ야
居居然浩浩然開襟獨酌岸幘長嘯景긔엇다ᄒᆞ니잇고？
草屋三間容膝裏昻昻一閒人〈再唱〉
琴書를벗을삼고松竹으로울을ᄒᆞ니
翛翛生事와淡淡襟懷예塵念이어ᄃᆡ나리？
時時예落照趁淸蘆花岸紅ᄒᆞ고
殘煙帶風楊柳飛ᄒᆞ거든
一竿竹빗기안고忘機伴鷗景긔엇다ᄒᆞ니잇고？
士何事乎？尙志而已。〈再唱〉
科名損志ᄒᆞ고利達害德이라。
모ᄅᆞ미黃卷中聖賢을뫼압고
言語精神日夜애頤養ᄒᆞ야
一身이正ᄒᆞ면어ᄃᆡ러로못가리오？
俯仰恢恢ᄒᆞ고往來平平ᄒᆞ니
갈길ᄅᆞᆯ알오立志를아니ᄒᆞ랴？
壁立萬仞磊落不變ᄒᆞ야
嘐嘐然尙友千古景긔엇다ᄒᆞ니잇고？
入山恐不深入林恐不密
寬閒之野寂寞之濱에卜居를定ᄒᆞ니
野服黃冠이魚鳥外버디업다。
芳郊애雨晴ᄒᆞ고萬樹애花落後에
靑藜杖뷔집고十里溪頭애閒往閒來ᄒᆞᄂᆞᆫᄠᅳ든
曾點氏浴沂風雩와程明道傍花隨柳도이러턴가엇다턴고
暖日光風이불ᄭᅥ니ᄇᆞᆯ거니興滿前ᄒᆞ니
悠然胸次ㅣ與天地萬物上下同流景긔엇다ᄒᆞ니잇고
집은范萊蕪의蓬蒿ㅣ오길은蔣元卿의花竹이로다。
百年浮生이러타엇다ᄒᆞ리？
진실로隱居求志ᄒᆞ고長往不返ᄒᆞ면
軒冕이泥塗ㅣ오鼎鍾이塵土ㅣ라。
千磨霜刃인ᄃᆞᆯ이ᄠᅳ들긋ᄎᆞ리랴？
韓昌黎三上書ᄂᆞᆫ내의ᄠᅳ데區區ᄒᆞ고
杜子美三大賦ㅣ내둉내行道ᄒᆞ랴？
두어라彼以爵我以義不願人之文繡ᄒᆞ야
世間萬事都付天命景긔엇다ᄒᆞ니잇고？
君門深九重ᄒᆞ고草澤隔萬里ᄒᆞ니
十載心事를어이ᄒᆞ야上達ᄒᆞ료
數封奇策이草ᄒᆞ얀디오래거다。
致君澤民은내의才分아니런가？
窮經學道를ᄠᅳᆮ두고이리ᄒᆞ랴？
ᄎᆞᆯ하리藏修丘壑遯世無悶ᄒᆞ야
날조ᄎᆞᆫ번님네뫼옵고綠籤山窓의
共把遺經究終始景긔엇다ᄒᆞ니잇고？
一屛一榻左箴右銘〈再唱〉
神目如電이라暗室을欺心ᄒᆞ며
天聽如雷라私語ᅟᅵᆫ들妄發ᄒᆞ랴？
戒愼恐懼를隱微間애닛디마새
坐如尸儼若思終日乾乾夕惕若ᄒᆞᄂᆞᆫᄠᅳᆮ든
尊事天君ᄒᆞ고攘除外累ᄒᆞ야
百體從令五常不斁ᄒᆞ야
治平事業을다이루려ᄒᆞ엿더니
時也命也인디迄無成功歲不我與ᄒᆞ니
白首林泉의ᄒᆞ올일이다시업다。
우읍다山之南水之北애斂藏蹤跡ᄒᆞ야
百年閒老景긔엇다ᄒᆞ니잇고？
閒居十八曲
编辑生平애願ᄒᆞᄂᆞ니다ᄆᆞᆫ忠孝ᄲᅮᆫ이로다。
이두일말면禽獸ㅣ나다라리야？
ᄆᆞᄋᆞᆷ애ᄒᆞ고져ᄒᆞ야十載遑遑ᄒᆞ노라。
計校이ᄅᆞ터니功名이느저셰라。
負笈東南ᄒᆞ야如恐不及ᄒᆞᄂᆞᆫᄠᅳᆮ을
歲月이물흘ᄋᆞᄃᆞᆺᄒᆞ니못이롤가ᄒᆞ야라。
비록못일워두林泉이됴ᄒᆞ니라。
無心魚鳥ᄂᆞᆫ自閒閒ᄒᆞ얏ᄂᆞ니
早晩애世事닛고너ᄅᆞᆯ조ᄎᆞ려ᄒᆞ노라。
江湖애노쟈ᄒᆞ니聖主를ᄇᆞ리례고
聖主를셤기쟈ᄒᆞ니所樂애어긔예라。
호온자岐路애셔셔갈ᄃᆡ몰라ᄒᆞ노라。
어지게이러그러이몸이엇디ᄒᆞᆯ고？
行道도어렵고隱處도定티아냣다。
언제야이ᄠᅳᆮ決斷ᄒᆞ야從我所樂ᄒᆞ려뇨？
ᄒᆞ려ᄒᆞ려ᄒᆞᄃᆡ이ᄠᅳᆮ못ᄒᆞ여라。
이ᄠᅳᆮᄒᆞ면至樂이잇ᄂᆞ니라。
우웁다엊그제아니턴일을뉘올타ᄒᆞ던고？
말리말리ᄒᆞᄃᆡ이일말기어렵다。
이일말면一身이閒暇ᄒᆞ다。
어지게엊그제ᄒᆞ던일이다왼줄알과라。
出ᄒᆞ면致君澤民處ᄒᆞ면釣月耕雲
明哲君子는이ᄅᆞᆯ사즐기ᄂᆞ니
ᄒᆞᄆᆞᆯ며富貴危機ㅣ라貧賤居를ᄒᆞ오리라。
靑山이碧溪臨ᄒᆞ고溪上애煙村이라。
草堂心事를白鷗ᅟᅵᆫ들제알랴？
竹窓靜夜月明ᄒᆞᆫᄃᆡ一張琴이잇ᄂᆞ니라。
窮達浮雲ᄀᆞᆺ치보야世事이저두고
好山佳水의노ᄂᆞᆫᄠᅳᆮ을
猿鶴이내벋아니어든어ᄂᆡ분이아ᄅᆞ실고？
ᄇᆞ람은절노ᄆᆞᆰ고ᄃᆞᆯ은절노ᄇᆞᆯᄯᅡ。
竹庭松檻애一點塵도업ᄉᆞ니
一張琴萬軸書더옥蕭灑ᄒᆞ다。
霽月이구룸ᄠᅳᆯ고솔ᄭᅳᆺ테ᄂᆞᆯ아올라
十分淸光이碧溪中에빗ᄭᅧ거ᄂᆞᆯ
어ᄃᆡ인ᄂᆞᆫ물일ᄒᆞᆫᄀᆞᆯ며기나ᄅᆞᆯ조차오ᄂᆞᆫ다。
날이져물거ᄂᆞᆯᄂᆞ외야ᄒᆞᆯ닐업서
松關을닫고月下애누어시니
世上애ᄯᅳᆺ글ᄆᆞᄋᆞᆷ이一毫末도업다。
月色溪聲어섯겨虛亭의오나ᄂᆞᆯ
月色을眼屬ᄒᆞ고溪聲을耳屬ᄒᆞㅣ
드ᄅᆞ며보며ᄒᆞ니一體淸明ᄒᆞ야라。
酒色좃쟈ᄒᆞ니騷人의일아니고
富貴求챠ᄒᆞ니ᄠᅳᆺ디아니가ᄂᆡ。
두어라漁牧이되오야寂寞濱애늘쟈。
行藏有道ᄒᆞ니ᄇᆞ리면구테구ᄒᆞ랴？
山之南水之北병들고늘근날를
뉘라셔懷寶迷邦ᄒᆞ니오라말라ᄒᆞᄂᆞ뇨？
聖賢의가신길히萬古애ᄒᆞᆫ가지라。
隱커나見커나道ㅣ얻디다ᄅᆞ리？
一道ㅣ오다ᄅᆞ디아니커니아ᄆᆞᄃᆡᆫ들엇더리？
漁磯예비개거ᄂᆞᆯ綠苔로독글사마
고기ᄅᆞᆯ혜이고낙글ᄠᅳᆮ을어이ᄒᆞ리？
纖月이銀鉤ㅣ되여碧溪心이ᄌᆞᆷ겻다。
江干애누어셔江水보ᄂᆞᆫᄠᅳ든
逝者如斯ᄒᆞ니百歲ᅟᅵᆫᄃᆞᆯ멷근이료？
十年前塵世一念이어ᄅᆞᆷ녹듯ᄒᆞᆫ다。