教㑹信錄　榕腔

一件、信、務一隻永生眞上帝、名囉耶和華。是自然而然、毛起頭、毛煞尾、無不在、無不知、無不能、極智慧。極清潔、極仁愛、極公平、極恩惠、極誠實。分位論伊、就務三位稱囉天父、耶穌、聖神。合性共體論伊、就㑚一隻。伊創造天地𠆧乇、自起頭彀煞尾、都是伊保護管理、實是天地𠆧乇其主宰、萬國萬𠆧該當奉事敬拜其上帝。

故務、信、除上帝以外、通世間所奉其神明、菩薩、香火、符册、神主牌、共一切所拜其乇、都是假其。𠆧都伓通藉伊保䕶、求伊賜福、也伓通用禮物奉事伊。

故務、信、耶穌教其聖經、是古早其聖人、感著聖神寫其。許裏所講、都是上帝旨意、教𠆧該當盡其本份。故此𠆧一舉一動、都著憑聖經、凡伓合聖經、都伓通憑。

故務、信、上帝創造𠆧其始祖時候、性原是善。以後二個𠆧、乞魔鬼誘惑、背上帝命、性就變惡。仱世間𠆧都是伊其後裔、故此都務者惡性、你欲行善、㑚欲行惡、時常務鄭、犯上帝其駛性。

故務、信、耶穌基督本來是上帝體許裏第二位伊降世做𠆧、由貞女馬利亞、感著聖神禮生特意做救世主、替𠆧落十字架當罪受苦、開救𠆧其路、死後仅活上天。𠆧㑚肯退悔信伊、罪就都�赦去、至死免受地獄永苦、�享天堂永福。

故務、信、𠆧本來伓欲悔攺、故此著藉聖神感化、隻�實心悔罪信耶穌。㑚昧受聖神感化、者𠆧賣免地獄其苦。

故務、信、𠆧隻信耶穌、心味都淸潔、邪故務剩。故此一世𠆧、著藉聖神帮助、隻�全潔、過世�入天、堂永享淸福。

故務、信、𠆧信耶穌、該當落𠆧前明認、入聖㑹、憑耶穌所命其規矩、守伊所立其禮。

故務、信、耶穌務立二樣禮、一件是洗禮、一件是晚餐。洗禮、是信其𠆧其記號、者禮㑚信其𠆧、共伊男女仔該當受。晚餐、是表明耶穌當時、受苦至死、替𠆧贖罪、凡信其𠆧、明認落𠆧前、隻�𠋡的、昧信其𠆧、切切伓通𠋡。

故務、信、𠆧生死㑚一囘、死後斷毛者轉世其代。𠆧落生前、㑚務憑眞理、信耶穌、身體雖然歸土、靈魂就上天堂享萬福。𠆧落生前、㑚昧憑眞理、昧信耶穌、身體雖然歸土、靈魂就墜地獄受萬苦。彀世間尾日、所有善惡其𠆧、都的的仅活、跬落救主臺前受審判、善其入天堂、惡其入地獄、一吓極樂、一吓極苦、永遠都賣變換。

會約

汝想本身務信耶穌、欲落𠆧前明認伊入教㑹。仱約、認耶和華做汝其上帝。認耶穌做汝其主、汝其先生、汝其救主。認聖神做汝其引路、駛汝成淸潔。認聖經論所該當信該當憑、做汝其法度。

汝仱𫉬自家、共凡所務其乇、獻乞上帝奉事伊。約一世𠆧、盡心盡意盡力、帮助耶穌聖教通行。仅公平做代、正心修身、日日表明好樣式、�駛𠆧歸榮上帝。

汝約共㑹中間衆𠆧、相愛相和、相親相讓、相勸相助、相苦相慰、盡力相行、像一家其𠆧一樣、主所贖囘其。連憑㑹中議定其規矩、謹守耶穌正教其常例。

汝全藉聖神、助汝成者代、仱著眾𠆧面前、天使面前、連創造汝其上帝面前、特直立者約。

牧師連眾㑹友接𠆧入㑹

我各𠆧仱接汝入㑹、齊做兄弟姐妹、共汝相約、憑主其命愛汝、時常看待汝。㑚願各𠆧、終身�齊守主其道理、以致彀審判日子、毛乇通責、�齊歡喜跬落主臺前。