翻译:惡之華/受詛嘅女人
| ← | 受詛嘅女人(德爾芬同希波呂塔) | 受詛嘅女人 作者：夏爾·皮耶·波德萊爾 譯者：木枚 |
兩個好姐妹 |
|
恍似沉吟嘅家畜瞓喺沙上，
佢哋嘅目光轉向海平線，
互覓嘅腳板同拍響嘅手掌，
帶住柔美嘅閒適同苦澀嘅震顫。
有人因長訴衷腸而心生愛慕，
木叢深處，河涓涓始流，
佢哋喺嗰度將膽怯嘅童年細數，
再喺青春嘅樹林雕刻木藪。
其他人就好似姊妹噉，步履凝重
穿過岩石間嘅幻影幢幢，
聖安東尼喺嗰度見到紫色裸胸
好似熔岩噉試探住湧動。
仲有啲人，身處剝落嘅樹脂嘅光芒，
喺老舊嘅異教巢穴嘅靜默空虛，
佢哋向你呼救，係出於呼嘯嘅瘋狂，
啊酒神，叫古老嘅懊悔沉睡!
至於其他人，佢哋嘅胸脯鍾意肩衣，
喺長衫底下收埋鞭具，
趁夜晚嘅暗林人跡罕至，
混和快樂嘅泡沫同痛苦嘅淚水。
啊處女，啊魔鬼，啊怪獸，啊烈士，
偉大嘅靈魂，現實嘅鄙視者，
無限嘅尋覓者，敬虔又好曝露隱私，
時而連連大嗌，時而不停泣嗟，
你喺你嘅地獄，被我嘅靈魂追逐，
陰公嘅姊妹，我越愛你就越可憐你，
皆因你死蔭嘅痛苦同無底嘅諸欲，
同將充滿你內心嘅愛承載嘅甕器!
