翻译:惡之華/吸血鬼嘅百變

吸血鬼嘅百變
作者：夏爾·皮耶·波德萊爾
譯者：木枚

本作品收錄於《Translation:惡之華》

而個女人有個櫻桃口，
佢似餘燼上嘅蛇纏扭，
令佢嘅胸貼合束腰嘅鋼鐵，
任由浸飽麝香嘅字詞流迭。
 「我嘅嘴唇濕潤，而且深知
點喺床笫間丟失仁義禮儀。
我擦乾我驕傲嘅胸上嘅淚，
再令老人嘅笑聲復歸童趣。
有個人睇到我嘅胴體不掛寸絲，
我為佢偷天換月，叫日轉星移。
親愛嘅學士，我對狂喜係咁熟悉，
當我用懼人嘅手臂將個男人壓迫，
或當我交托畀齒印嘅心胸
內斂放蕩，又剛弱並重，
激動中再喺呢兩片軟墊昏困，
羸弱嘅天使會為我出賣靈魂。」

當佢吸晒我所有骨髓，
我再懶洋洋噉望向佢，
想要畀佢深情一吻，我眼內只有
兩側黐𣲷𣲷嘅酒囊，膿水橫流!
我合埋雙眼，身處嘅寒意令人驚慌，
當我再開眼，面對活潑靈動嘅光芒，
我身邊原應係個頑強嘅玩偶
睇落似係已經將血液藏收，
取代之嘅係孤疑噉顫抖嘅骨駭，
佢哋發出嘅聲似風信雞嘅大嗌，
又似喺鐵杆端嘅路標
喺冬夜嘅風中飄搖。