翻译:惡之華/死屍
| ← | 起舞嘅蛇 | 死屍 作者：夏爾·皮耶·波德萊爾 譯者：木枚 |
我從深處向你求告 |
|
親愛嘅，記唔記得我哋見過
喺個咁美好柔和嘅夏日朝早，
有條發臭嘅死屍喺路中間躺臥，
停屍嘅床上礫石滿布，
佢似個淫婦雙腳朝天，
身上滲出嘅毒液滾燙，
佢憤世嫉俗又心不在焉，
將佢充滿排泄物嘅下體開放。
陽光照耀喺呢舊腐爛物體，
似係為咗將佢蒸煮到恰到好處。
將偉大嘅自然組裝嘅一切，
百倍奉還畀原主。
屍容似綻放嘅花姣好，
畀上天端詳，
條屍陣臭味係強烈到
會令你暈喺草地上。
烏蠅喺腐爛嘅下體上嗡嗡拍翼，
黑壓壓嘅蛆蟲大軍從入面出走，
好似涓涓黏液
沿住呢堆活生生嘅爛布順流。
一切或似波浪退或漲，
或帶急速嘅噼啪聲外竄，
可以話個肉體畀股微弱嘅氣吹脹，
一邊繁殖一邊求存。
世界奏出奇怪嘅音樂，
似水、似風
或似穀粒畀風車拋上拋落
再喺佢筲箕上搖動。
形體消失，不過係幻夢一場，
有種罪孽姍姍來遲，
要被藝術家喺被遺忘嘅畫布上，
借回憶先可以達致。
巨石後面有隻焦急嘅狗
向我哋怒睥，
等緊時機喺嗰副骷髏，
搶返佢之前丟失嘅。
但你終有一日會變成呢堆渣滓
變成呢種病害，
我眼中嘅星，我世界嘅太陽光彩，
你，係我嘅天使，我情之所在！
係啊，你會變成噉，施恩嘅女王，
喺上次聖事之後，
當你喺草木同百花之下靜躺，
再喺骨堆爛臭。
我嘅美人，害蟲將你邊蠶蝕邊親吻
你要向佢哋講話
我有守護我啲分解晒嘅愛人
嘅皮囊同神聖嘅精華！
