翻译:惡之華/煙囪

煙囪
作者：夏爾·皮耶·波德萊爾
譯者：木枚

本作品收錄於《Translation:惡之華》

回憶之母，情婦之顛，
你啊，我所有嘅愉悅同責任，
你會記得我哋纏綿嘅美善、
爐邊嘅甜蜜，同喺春宵傾心，
回憶之母，情婦之顛!

某夜由木炭嘅熱點燃，
同喺煙囪畀粉色熱氣輕掩嘅某夜。
你心口於我係幾咁軟，心係幾咁善!
我哋經常講天長地久嘅嘢，
某夜由木炭嘅熱點燃。

黃昏炎熱，太陽絕美，
穹蒼如此深奧，雄心如此剛強，
女神中嘅女王，我折腰於你，
自以為呼吸住你血液嘅芳香。
黃昏炎熱，太陽絕美。

恍似圍城嘅夜幕將天空侵略，
我雙眼喺漆黑中諗住你嘅凝視，
我吞下你嘅吐息，係甘甜，又係毒藥!
你對腳喺我充滿兄弟愛嘅手上休止。
恍似圍城嘅夜幕將天空侵略。

喚起快樂光陰嘅技藝，我已經深諳，
仲識再經歷依偎喺你膝頭嘅往昔。
除咗喺你嬌軀同咁善良嘅心，

你慵懶嘅美，仲可以喺邊度尋覓?
喚起快樂光陰嘅技藝，我已經深諳。

呢啲誓言、芳香、無盡嘅親吻，
會唔會自深不可測嘅深淵重生?
好似洗刷喺深海嘅太陽日日新，
再向住天空飛騰。
誓言啊、芳香啊、無盡嘅親吻!