学堂教戏即系孔子教乐啫

学堂教戏即系孔子教乐啫
1908年2月15日

本作品收录于《岭南白话杂志/第二期》

喂喂，你地睇过个班优天影戏唔层亚，都唔错播，乜野唔错亚？唔系妖脂扭𢴕唔错播，如果讲妖脂扭𢴕，个哋要睇肖洒湘正得咯。但系肖洒湘，话得咁好，我究竟唔曾睇过；惟是凡有讲肖洒湘好个哋人，我见都系下流社会嘅多，唔系几晓睇戏嘅人只。点解我要话佢唔哙睇戏唎？佢唔层晓个戏字解法，所以我话佢唔哙睇戏啫。今日哋戏，点样得嚟架？系由古时乐部里头，变化出嚟嘅。古时嘅乐，今日边处重有得传吖？经几千年世界，就系有得传，好似如金石𮈔竹个哋敢嘅音韵，俾就唔听唎。所以古时嘅乐，奏起上嚟，“辟力仆立、辟力仆立”敢声嘅，点同得今时哋乐“何尺士工、何尺士工”咁好听唎。但系古时嘅乐，各人睇得佢好重嘅播。孔子教人，第一件礼，第二件乐；教颜渊又话要“乐则韶舞”；就系佢自己正算啰，都系好大引听野架，在齐闻韶，三个月都唔知到肉味，你话几紧要唎，睇得哋乐几重唎。今日哋人，动不动话做戏系下流人，佢唔知到今日嘅戏子，即系旧时嘅乐官一样啫。但系敢，唔怪得嘅，试问吓今日哋戏，有边一班系叫做出色架？有边一个老官，系晓到做戏即系古时作乐一样架？唔系一咪做到佢淫，就做到佢肉酸嚟引人系啰，知敢就弊唎，敢就失晒孔子教人学乐嘅本立去唎。孔子论乐，最重在韶，韶系太平嘅乐嚟，我试问吓你地，今日系太平时候唔系唎？如果唔系太平时候，就要思想到点样正得佢太平唎，敢就咪唱咁多亡国之音正得咯；唔唱咁多亡国之音，就要将现时哋戏本嚟改良正得咯。你唔见古时太师师旷个班人咩？一哋都系有材学嘅人，孔子也层以乐嚟教过佢嘅咯播；个班人一出一处，为国家无亡所紧嘅，同今日肖洒湘个班等等，同唔同吖？我上先话优天影唔错者，因系个班人，系学界报界有才学嘅人，能究出嚟做戏，以补救社会及一国，抱孔子韶乐太平嘅希望，与孔教有合，故此将佢嚟讲啫。然则旧年本社慈善会，教哋学生出嚟做戏，都唔系冇所本嘅播。本社教戏，即系孔子教乐嘅意思嚟乍。如果敢讲，伯爷公都系唔钟意听，敢就唔驶讲唎。