翻译:恶之华/兰舟

兰舟
作者：夏尔·皮耶·波德莱尔
译者：木枚

本作品收录于《Translation:恶之华》

甜美嘅尤物，我想同你诉说，
风情万种将你嘅青春点缀，
我想向你嘅美深入，
绘出佢幼嫩同成熟嘅珠联壁合。

当你著住翩翩长裙行走，
睇落好似要出航嘅兰舟，
顺住温柔、慵懒、缓慢嘅节奏，
风帆全开，随波浪滚流。

你嘅肩颈圆润宽大，
五官以异邦嘅光辉显摆，
泰然自若，气扬趾高，
尊贵嘅细路，你踏上自己嘅征途。

甜美嘅尤物，我想同你诉说，
风情万种将你嘅青春点缀，
我想向你嘅美深入，
绘出佢幼嫩同成熟嘅珠联壁合。

你嘅胸脯浮凸，闪烁不住，
洋洋得意，系个珍美嘅衣橱，
门板凹陷又分明，
似个细圆盾光泽炯炯。

挑逗人嘅圆盾，配备粉红嘅尖啄，
美好秘密嘅衣橱，满载美好景象，
红酒、香芬、利口酒，
令人理性同感性都欢喜个够。

当你著住翩翩长裙行走，
睇落好似要出航嘅兰舟，
顺住温柔、慵懒、缓慢嘅节奏，
风帆全开，随波浪滚流。

你对高贵嘅脚喺佢追逐嘅裙摆下，
将阴暗嘅欲望撩动同千刀万剐，
好似两个巫师一同
将长樽嘅黑色药水搅动。

你双手同发光嘅毒蛇平分秋色，
连早熟嘅大力士要做对手都唔值，
天生就系用嚟畀人握紧，
彷似要喺你嘅心同爱人身上烙印。

你嘅肩颈圆润宽大，
五官以异邦嘅光辉显摆，
泰然自若，气扬趾高，
尊贵嘅细路，你踏上自己嘅征途。