身體理/論保惜目睭天然兮法度

第116節

目睭是不只寶貝兮物，所以備辦逐項齊備來保護。目仁深入目睭窩，雙爿頂下攏有肌肉隨便通轉輪，按呢若愛看邊頭兮物抑是懸低兮物，只有著轉輪一下則會看見。目仁頂下頷有目睭皮會褫開會合。若有甚物咧欲磕著就家己會𥍉來保護目睭。目睭皮兮墘有目睫毛是予坱埃佮屬胡蠅兮類較袂入。目墘也會生淡薄油予頂下兮墘較袂相黏。

目睭有兮頂面外角有目屎泉差不多親像杏仁兮大。伊兮功用是會生液若水來常常潤澤目睭閣有一條細細兮管，目屎對遮兮管流落鼻空內則勻勻仔焦去。設使儂艱苦心啼哭目屎則生較濟，流袂一盡落鼻就滿出佇面。減采目睭用著就連鞭有目油較濟會流出來洗除。