芦溪先生文集 (朴仁老)/卷三
歌
编辑太平词戊戌季冬。釜山屯贼。乘夜奔溃。时公佐左兵使成允文幕。兵使闻即率军驰到釜山。留十馀日后还到本营。明日。使之作此歌。
编辑나라히偏小ᄒᆞ야海东애ᄇᆞ려셔도箕子遗风이古今업시淳厚ᄒᆞ야二百年来예礼义을崇尚ᄒᆞ니衣冠文物이汉唐宋이되야ᄯᅥ니岛夷百万이一朝애冲突ᄒᆞ야亿兆惊魂이칼빗ᄎᆞᆯ조차나니平原에사힌ᄲᅨᄂᆞᆫ뫼두곤노파잇고雄都巨邑은豺狐窟이되얏거ᄂᆞᆯ凄凉玉辇이蜀中으로뵈와드니烟尘이아득ᄒᆞ야日色이열워ᄯᅥ니圣天子神武ᄒᆞ샤一怒를크게내야平壤群凶을一剑下의다버히고风驱南下ᄒᆞ야海口에더져두고穷寇을勿迫ᄒᆞ야몃몃ᄒᆡ를디내연고江左一带예孤云갓ᄒᆞᆫ우리물이偶然时来예武侯龙을幸혀만나五德이ᄇᆞᆯ근아래猎狗몸이되야ᄯᅥ가英雄仁勇을喉舌에섯겨시니炎方이稍安ᄒᆞ고士马精强ᄒᆞ야ᄯᅥ니皇朝一夕에大风이다시이니龙ᄀᆞᆺᄒᆞᆫ将帅와구름ᄀᆞᆺᄒᆞᆫ勇士들이旌旗蔽空ᄒᆞ야万里예이어시니兵声이大振ᄒᆞ야山岳을ᄯᅴ엿ᄂᆞᆫᄃᆞᆺ兵房御营大将은先锋을引导ᄒᆞ야贼阵에突击ᄒᆞ니疾风大雨에霹雳이즈ᄎᆡᄂᆞᆫᄃᆞᆺ清正小竖头도掌中에잇것마ᄂᆞᆫ天雨为祟ᄒᆞ야士卒이疲困커ᄂᆞᆯ져근ᄃᆞᆺ解围ᄒᆞ야士气을쉬우더가贼徒ㅣ犇溃ᄒᆞ니못다잡아말년졔고窟穴을구어보니구든덧도ᄒᆞ다마ᄂᆞᆫ有败灰烬ᄒᆞ니不在险을알니로다上帝圣德과吾王沛泽이远近업시미쳐시니天诛猾贼ᄒᆞ야仁义를돕ᄂᆞᆫᄯᅩ다海不扬波이졘가너기로라无状ᄒᆞᆫ우리물도臣子되야이셔더가君恩을못갑흘가敢死心을가져이셔七载를奔走터가太平오ᄂᆞᆯ보완디고投兵息戈ᄒᆞ고细柳营도라들제太平箫노픈솔의예鼓角이섯겨시니水宫깁흔곳의鱼龙이다우ᄂᆞᆫᄃᆞᆺ龙旗偃蹇ᄒᆞ야西风에빗겨시니五色祥云一片이半空애ᄯᅥ러딘ᄃᆞᆺ太平模样이더옥ᄒᆞ나반가올사扬弓举矢ᄒᆞ고凯歌를아뤼오니争唱欢声이碧空애얼ᄒᆡᄂᆞ다三尺霜刃을兴气계워둘러메고仰面长啸ᄒᆞ야춤을추려이러셔니天宝龙光이斗牛间의소이ᄂᆞ다手之舞之足之蹈之절노절노즐거오니歌七德舞七德을그칠줄모ᄅᆞ로다人间乐事ㅣ이ᄀᆞᆺᄒᆞ니ᄯᅩ인ᄂᆞᆫ가华山이어ᄃᆡ오이말을보내고져天山이어ᄃᆡ오이활을노피거쟈이제야ᄒᆞ올일이忠孝一事ᄲᅮᆫ이로다营中에일이업셔긴ᄌᆞᆷ드러누어시니뭇노라이날이어ᄂᆡ적고羲皇盛时를다시본가너기로랴天无淫雨ᄒᆞ니白日이더욱ᄇᆞᆯ다白日이ᄇᆞᆯ그니万方애비최노다处处沟壑애흐터잇던老羸드리东风新燕가치旧巢을ᄎᆞ자오니首邱初心에뉘아니반겨ᄒᆞ리爰居爰处에즐거옴이엇더ᄒᆞᆫ뇨孑遗生灵들아圣恩인줄아ᄂᆞᄉᆞᆫ다圣恩이기픈아ᄅᆡ五伦을발켜ᄉᆞ라教训生聚ㅣ라졀로아니닐어가랴天运循环을아옵게다하ᄂᆞ님아佑我邦国ᄒᆞ샤万世无疆눌리소셔唐虞天地예三代日月비최소셔于万斯年에兵革을그치소셔耕田凿井에击壤歌을불니소셔우리도圣主을뫼ᄋᆞᆸ고同乐太平ᄒᆞ오리라
莎堤曲莎堤。地名。在龙津江东距五里许。即汉阴李相公江亭所在处也。公代相公作此曲。
编辑어리고拙ᄒᆞᆫ몸애荣宠이已极ᄒᆞ니鞠躬尽瘁ᄒᆞ야죽어야말녀너겨夙夜匪懈ᄒᆞ야밤을닛고思度ᄒᆞᆫᄃᆞᆯ관솔의현불로日月明을도올ᄂᆞᆫ가尸位伴食을몃ᄒᆡ나지내연고늘고病이드러骸骨를빌리실ᄉᆡ汉水东ᄯᅡ흐로访水寻山ᄒᆞ야龙津江디내올나莎堤안도라드니第一江山이임ᄌᆡ업시ᄇᆞ려ᄂᆞ다平生梦想이오라ᄒᆞ야그러턴지水光山色이녯ᄂᆞᆺᄎᆞᆯ다시본ᄃᆞᆺ无情ᄒᆞᆫ山水도有情ᄒᆞ야보이ᄂᆞ다白沙汀畔의落霞을빗기ᄯᅴ고三三五五히섯거노ᄂᆞᆫ뎌白鸥야너ᄃᆞ려말뭇쟈놀ᄂᆡ디마라ᄉᆞ라이名区胜地을어ᄃᆡ라드러ᄯᅥᆫ다碧波ㅣ洋洋ᄒᆞ니渭水伊川아닌게오层峦이兀兀ᄒᆞ니富春箕山아닌게오林深路黑ᄒᆞ니晦翁云谷아닌게오泉甘土肥ᄒᆞ니李愿盘谷아닌게오徘徊思忆호ᄃᆡ아모ᄃᆡᆫ줄내몰내라岸芝汀兰은清香이郁郁ᄒᆞ야远近에이어잇고南涧东溪예落花ㅣᄀᆞᄃᆞᆨᄌᆞᆷ겨거ᄂᆞᆯ荆棘을헤혀드러草屋数间지어두고鹤发을뫼지고终孝를ᄒᆞ려너겨爰居爰处ᄒᆞ니此江山之임재로다三公不换此江山을오ᄂᆞᆯᄉᆞ아라고야어즈러온鸥鹭와数업ᄉᆞᆫ麋鹿을내혼자거ᄂᆞ려六畜을삼아거든갑업ᄉᆞᆫ清风明月은절노己物되야시니ᄂᆞᆷ과다ᄅᆞᆫ富贵는이ᄒᆞᆫ몸애ᄀᆞ자ᄭᅩ야이富贵가지고져富贵부를소냐부를줄모ᄅᆞ거든사괼줄알리넌가红尘도머러가니世事을듯볼소냐花开叶落아니면어ᄂᆡ节을알리런고中隐庵쇠붑소ᄅᆡ谷风의섯거ᄂᆞ라梅窗의이르거든午睡를ᄀᆞᆺᄭᆡ야病目을여러보니밤비예ᄀᆞᆺ핀가지暗香을보내여봄쳘을알외ᄂᆞ다春服을쳐엄닙고丽景이더듼져긔青藜杖빗기쥐고童子六七불너내야속닙난잔ᄯᅬ예足容重케흣거러清江의발을싯고风乎江畔ᄒᆞ야兴을타고도라오니舞雩咏而归ᄅᆞᆯ져그나부ᄅᆞᆯ소냐春兴이이러커든秋兴이라져글넌가金风이瑟瑟ᄒᆞ야庭畔애지ᄂᆡ부니머괴입지ᄂᆞᆫ소ᄅᆡ먹은귀를놀ᄅᆡᄂᆞ다正值秋风을中心에더욱반겨낙ᄃᆡ을둘러메고红蓼을헤혀도러小艇을글러노화风帆浪楫으로가ᄂᆞᆫᄃᆡ로더뎌두니流下前滩ᄒᆞ야浅水边에오도고야夕阳이거읜젹의江风이짐즉부러归帆을보ᄂᆡᄂᆞᆫᄃᆞᆺ아ᄃᆞᆨᄃᆞᆫ前山도忽后山의보이ᄂᆞ다须臾羽化ᄒᆞ야莲叶舟에올나ᄂᆞᆫᄃᆞᆺ东坡赤壁游ᅟᅵᆫᄃᆞᆯ이내兴에엇지더며张翰江东去ᅟᅵᆫᄃᆞᆯ오ᄂᆞᆯ景에미ᄎᆞᆯ넌가居水에이러커든居山이라偶然ᄒᆞ랴山房의秋晩커ᄂᆞᆯ幽怀를둘ᄃᆡ업서云吉山돌길ᄒᆡ막ᄃᆡ집고쉬여올나任意逍遥ᄒᆞ며猿鹤을벗을삼아乔松을비기여四隅로도라보니天工이工巧ᄒᆞ야묏빗ᄎᆞᆯᄭᅮᆷ이ᄂᆞᆫ가흰구ᄅᆞᆷ말근ᄂᆡᄂᆞᆫ片片이ᄯᅥ여나라노푸락나지락峯峯谷谷이面面에버럿ᄭᅥ든서리친신남기봄ᄭᅩᆺ도곤불거시니锦绣屏风을叠叠이둘너ᄂᆞᆫᄃᆞᆺ千态万状이僭滥ᄒᆞ야보이ᄂᆞ다힘세이다토면내분에올가마ᄂᆞᆫ禁ᄒᆞ리업ᄉᆞᆯᄉᆡ나도두고즐기노라ᄒᆞ물며南山ᄂᆞ린긋ᄒᆡ五谷을가초심거먹고못남아도긋지나아니ᄒᆞ면내집의내밥이그맛시엇더ᄒᆞ뇨采山钓水ᄒᆞ니水陆品도잠ᄭᅡᆫᄀᆞᆺ다甘旨奉养을足다사ᄒᆞᆯ가마ᄂᆞᆫ乌鸟含情을벱고야말녓노라私情이이러ᄒᆞ야아직물러나와신ᄃᆞᆯ罔极ᄒᆞᆫ圣恩을어ᄂᆡ刻애이질넌고犬马微诚은白首에야더옥깁다时时로머리드러北辰을ᄇᆞ라보니ᄂᆞᆷ모ᄅᆞᄂᆞᆫ눈물이두사ᄆᆡ예다졋ᄂᆞ다이눈물보건ᄃᆡᆫ참아물너날ᄭᅡ마ᄂᆞᆫᄀᆞᆺᄃᆞᆨᄒᆞᆫ不才예病ᄒᆞ나디터가고萱堂老亲은八旬이거의거든汤药을그치며定省을뷔울넌가이ᄌᆡ야어ᄂᆡᄉᆞ예이山밧긔날오소냐许由의시슨귀예老莱子의오ᄉᆞᆯ입고압뫼예져솔이풀은쇠되도록함긔뫼셔늘그리라
陋巷词公从游汉阴相公。相公问公山居穷苦之状。公乃述己怀作此曲。
编辑어리고迂阔ᄒᆞᆯ산이ᄂᆡ우ᄒᆡ더니업다吉凶祸福을하날긔부쳐두고陋巷깁푼곳의草幕을지어두고风朝雨夕에석은딥히셥히되야셔홉밥닷홉粥에烟气도하도할샤설데인熟冷애뷘ᄇᆡ쇡일ᄲᅮᆫ이로다生涯이러ᄒᆞ다丈夫ᄯᅳᆺ을옴길넌가安贫一念을젹을망졍품고이셔随宜로살려ᄒᆞ니날로조차龃龉ᄒᆞ다ᄀᆞᄋᆞᆯ히不足거든봄이라有馀ᄒᆞ며주머니뷔엿거든甁의라담겨시랴贫困ᄒᆞᆫ人生이天地间의나ᄲᅮᆫ이라饥寒이切身ᄒᆞ다一丹心을이질ᄂᆞᆫ가奋义忘身ᄒᆞ야죽어야말녀너겨于橐于囊의줌줌이모와녀코兵戈五载예敢死心을가져이셔履尸涉血ᄒᆞ야몃百战을지ᄂᆡ연고一身이馀暇잇사一家를도라보랴一奴长须ᄂᆞᆫ奴主分을이졋거든告余春及을어ᄂᆡ사이ᄉᆡᆼ각ᄒᆞ리耕当问奴ᅟᅵᆫᄃᆞᆯ눌ᄃᆞ려물ᄅᆞᆯᄂᆞᆫ고躬耕稼穑이ᄂᆡ分인줄알리로다莘野耕叟와垄上耕翁을贱타ᄒᆞ리업것마ᄂᆞᆫ아므려갈고젼ᄃᆞᆯ어ᄂᆡ쇼로갈로손고旱既太甚ᄒᆞ야时节이다느즌졔西畴놉흔논애잠ᄭᅡᆫᄀᆡᆫ녈비예道上无源水을반만ᄭᅡᆫᄃᆡ혀두고쇼ᄒᆞᆫ젹듀마ᄒᆞ고엄섬이ᄒᆞᄂᆞᆫ말삼亲切호라너건집의달업슨黄昏의허위허위다라가셔구디다ᄃᆞᆫ门밧긔어득히혼자서셔큰기ᄎᆞᆷ아함이를良久토록ᄒᆞ온后에어화긔뉘신고廉耻업산ᄂᆡ옵노라初更도거읜ᄃᆡ긔엇지와겨신고年年에이러ᄒᆞ기苟且ᄒᆞᆫ줄알건만ᄂᆞᆫ쇼업ᄉᆞᆫ穷家애혜염만하왓삽노라공ᄒᆞ니나갑시나주엄즉도ᄒᆞ다마ᄂᆞᆫ다만어제밤의거빈집져사람이목불근수기雉을玉脂泣게ᄭᅮ어ᄂᆡ고간이근三亥酒을醉토록劝ᄒᆞ거든이러한恩惠을어이아니갑흘넌고来日로주마ᄒᆞ고큰言约ᄒᆞ야거든失约이未便ᄒᆞ니사셜이어려왜라实为그러ᄒᆞ면혈마어이할고헌먼덕수기스고측업슨집신에설피설피물너오니风彩저근形容애ᄀᆡ즈칠ᄲᅮᆫ이로다蜗室에드러간ᄃᆞᆯ잠이와사누어시랴北窗을비겨안자ᄉᆡᄇᆡᄅᆞᆯ기다리니无情ᄒᆞᆫ戴胜은이ᄂᆡ恨을도우ᄂᆞ다终朝惆怅ᄒᆞ며먼들흘바라보니즐기ᄂᆞᆫ农歌도兴업서들리ᄂᆞ다世情모ᄅᆞᆫ한숨은그칠줄을모ᄅᆞᄂᆞ다아ᄭᆞ온져소뷔ᄂᆞᆫ볏보님도됴ᄒᆞᆯ세고가시엉긘묵은밧도容易케갈련마ᄂᆞᆫ虚堂半壁에슬듸업시걸려고야春耕도거의거다후리쳐더뎌두쟈江湖ᄒᆞᆫᄭᅮᆷ을ᄭᅮ언지도오ᄅᆡ러니口腹이为累ᄒᆞ야어지버이져ᄯᅥ다瞻彼淇澳혼ᄃᆡ绿竹도하도할샤有斐君子들아낙ᄃᆡᄒᆞ나빌려ᄉᆞ라芦花깁픈곳애明月清风벗이되야님ᄌᆡ업ᄉᆞᆫ风月江山애절로절로늘그리라无心ᄒᆞᆫ白鸥야오라ᄒᆞ며말라ᄒᆞ랴다토리업슬ᄉᆞᆫ다문인가너기로라无状ᄒᆞᆫ이몸애무슨志趣이스리마ᄂᆞᆫ두세이렁밧논를다무겨더뎌두고이시면粥이오업시면굴물망졍남의집남의거슨젼혀부러말렷노라ᄂᆡ贫贱슬히너겨손을헤다물너가며남의富贵불리너겨손을치다나아오랴人间어ᄂᆡ일이命밧긔삼겨시리贫而无怨을어렵다ᄒᆞ건마ᄂᆞᆫᄂᆡ生涯이러호ᄃᆡ설온ᄯᅳᆺ은업노왜라箪食瓢飮을이도足히너기로라平生ᄒᆞᆫᄯᅳᆺ이温饱애ᄂᆞᆫ업노왜라太平天下애忠孝를일을삼아和兄弟信朋友외다ᄒᆞ리뉘이시리그밧긔남은일이야삼긴ᄃᆡ로살렷노라
早红柹歌辛丑九月初。汉阴相公馈公早红柹。公因时物有感而作。
编辑盘中早红감이고아도보이ᄂᆞ다柚子안이라도품엄즉도ᄒᆞ다마ᄂᆞᆫ품어가반기리업슬ᄉᆡ글노설워ᄒᆞᄂᆞ이다
王祥의鲤鱼잡고孟宗의竹笋ᄭᅥᆨ거검던멀리희도록老莱子의오ᄉᆞᆯ입고一生애养志诚孝를曾子ᄀᆞᆺ치ᄒᆞ리이다
万匀을늘려내야길게길게노흘ᄭᅩ아九万里长天에가ᄂᆞᆫᄒᆡ를자바ᄆᆡ야北堂의鹤发双亲을더듸늘게ᄒᆞ리이다
群凤모다신듸외가마기드러오니白玉사힌곳애돌ᄒᆞᆫ아갓다마ᄂᆞᆫ두어라凤凰도飞鸟와类시니뫼셔논ᄃᆞᆯ엇더ᄒᆞ리
○莎堤曲。何为而作也。昔在辛亥春。曾祖考汉阴相公退老。与朴芦溪仁老述怀之曲也。世代既远。此曲无传。恐其泯没于后。窃尝慨然于心者稔矣。不肖孙允文。是岁庚午春。除永川郡守。公即兹土人也。其曲尚今流传。其孙亦且生存。公馀月夕。以其孙进善命歌而听之。恍若后生叨陪杖屦于龙津山水之间。怆怀益激。感泪自零。幷与陋巷及短歌四章而付诸剞劂氏。以图广传焉。时是年三月三日也。〈板在本郡。而今失。〉
船上叹时。国家尚忧南陲。选公统舟师。赴防釜山。公临船作此曲。
编辑늘고病든몸을舟师로보ᄂᆡ실ᄉᆡ乙巳三夏애镇东营ᄂᆞ려오니关防重地예病이깁다안자실랴一长剑비기ᄎᆞ고兵船에구테올나励气瞋目ᄒᆞ야对马岛을구어보니ᄇᆞ람조친黄云은远近에사혀잇고아득ᄒᆞᆫ沧波ᄂᆞᆫ긴하ᄂᆞᆯ과ᄒᆞᆫ빗칠쇠船上에徘徊ᄒᆞ며古今을思忆ᄒᆞ고어리미친怀抱애轩辕氏를애ᄃᆞ노라大洋이茫茫ᄒᆞ야天地예둘려시니진실로ᄇᆡ아니면风波万里밧긔어ᄂᆡ四夷엿볼넌고무ᄉᆞᆷ일ᄒᆞ려ᄒᆞ야ᄇᆡ못기를비롯ᄒᆞᆫ고万世千秋에ᄀᆞ업ᄉᆞᆫ큰弊되야普天之下애万民怨길우ᄂᆞ다어즈버ᄭᆡᄃᆞ라니秦始皇의타시로다ᄇᆡ비록잇다ᄒᆞ나倭를아니삼기던들日本对马岛로뷘ᄇᆡ졀로나올넌가뉘말을미더듯고童男童女를그ᄃᆡ도록드려다가海中모든셤에难当贼을기쳐두고痛愤ᄒᆞᆫ羞辱이华夏애다밋나다长生不死药을얼ᄆᆡ나어더ᄂᆡ여万里长城놉히사고몃万年을사도ᄯᅥᆫ고ᄂᆞᆷᄃᆡ로죽어가니有益ᄒᆞᆫ줄모ᄅᆞ로다어즈버ᄉᆡᆼ각ᄒᆞ니徐巿等이已甚ᄒᆞ다人臣이되야셔亡命도ᄒᆞᄂᆞᆫ것가神仙을못보거든수이나도라오면舟师이시럼은견혀업게삼길럿다두어라既往不咎라일너무엇ᄒᆞ로소니쇽졀업ᄉᆞᆫ是非를후리쳐더뎌두쟈潜思觉寤ᄒᆞ니내ᄯᅳᆺ도固执고야黄帝作舟车ᄂᆞᆫ왼줄도모ᄅᆞ로다张翰江东애秋风을만나신들扁舟곳아니타면天清海阔ᄒᆞ다어ᄂᆡ兴이졀로나며三公도아니밧골第一江山애浮萍ᄀᆞᆺᄒᆞᆫ渔父生涯을一叶舟아니면어ᄃᆡ부쳐ᄃᆞᆫ힐ᄂᆞᆫ고일언닐보건ᄃᆡᆫᄇᆡ삼긴制度야至妙ᄒᆞᆫ덧ᄒᆞ다마ᄂᆞᆫ엇디ᄒᆞᆫ우리물은ᄂᆞᄂᆞᆫᄃᆞᆺᄒᆞᆫ板屋船을昼夜의빗기ᄐᆞ고临风咏月호ᄃᆡ兴이젼혀업ᄂᆞᆫ게오昔日舟中에ᄂᆞᆫ杯盘이狼籍터니今日舟中에ᄂᆞᆫ大剑长枪ᄲᅮᆫ이로다ᄒᆞᆫ가지ᄇᆡ언마ᄂᆞᆫ가진ᄇᆡ다라니其间忧乐이서로ᄀᆞᆺ지못ᄒᆞ도다时时로멀이드러北辰울ᄇᆞ라보며伤时老泪ᄅᆞᆯ天一方의디이ᄂᆞ다吾东方文物이汉唐宋애디랴마ᄂᆞᆫ国运이不幸ᄒᆞ야海丑凶谋애万古羞을안고이셔百分애ᄒᆞᆫ가지도못시셔ᄇᆞ려거든이몸이无状ᄒᆞᆫᄃᆞᆯ臣子ㅣ되야이셔다가穷达이길이달라몬뫼ᄋᆞᆸ고늘거신ᄃᆞᆯ忧国丹心이야어ᄂᆡ刻애이즐넌고慷慨계운壮气ᄂᆞᆫ老当益壮ᄒᆞ다마ᄂᆞᆫ됴고마ᄂᆞᆫ이몸이病中에드러시니雪愤伸冤이어려올ᄃᆞᆺᄒᆞ건마ᄂᆞᆫ그러나死诸葛도生仲达을멀리좃고발업ᄉᆞᆫ孙膑도庞涓을잡아거든ᄒᆞ믈며이몸은手足이ᄀᆞ자잇고命脉이이어시니鼠窃狗偸을저그나저흘소냐飞船에ᄃᆞᆯ려드러先锋을거치면九十月霜风에落叶가치헤치리라七纵七禽을우린ᄃᆞᆯ못ᄒᆞᆯ것가蠢彼岛夷들아수이乞降ᄒᆞ야ᄉᆞ라降者不杀이니너를구ᄐᆡ歼灭ᄒᆞ랴吾王圣德이欲幷生ᄒᆞ시니라太平天下애尧舜君民되야이셔日月光华ᄂᆞᆫ朝复朝ᄒᆞ얏거든战船ᄐᆞ던우리몸도渔舟에唱晩ᄒᆞ고秋月春风에놉히베고누어이셔圣代海不扬波ᄅᆞᆯ다시보려ᄒᆞ노라
独乐堂在庆州玉山。即晦斋李先生所居堂也。公往寻遗躅。因作此歌。
编辑紫玉山名胜地예独乐堂이萧洒홈을들런디오래로ᄃᆡ이몸이武夫로서海边事ㅣ孔棘거ᄂᆞᆯ一片丹心에奋义를못내ᄒᆞ야金枪铁马로馀暇업시奔走터가中心景仰이白首에더옥깁허竹杖芒鞋로오날사ᄎᆞ자오니峯峦은秀丽ᄒᆞ야武夷山이되여잇고流水ᄂᆞᆫ盘回ᄒᆞ야后伊川이되엿ᄂᆞ다이러ᄒᆞᆫ名区에임ᄌᆡ어이업도ᄯᅥᆫ고一千年新罗와五百载高丽에贤人君子들이만히도지ᄂᆡᆫ마ᄂᆞᆫ天悭地秘ᄒᆞ야我先生ᄭᆡ기치도다物各有主ㅣ어든ᄃᆞ토리이실소냐青萝를헤혀드러独乐堂을여러ᄂᆡ니幽闲景致ᄂᆞᆫ견홀ᄃᆡ뇌야업ᄂᆡ千竿修竹은碧溪조차둘너잇고万卷书册은四壁의사혀시니颜曾이在左ᄒᆞ고游夏ᄂᆞᆫ在右ᄒᆞᆫᄃᆞᆺ尚友千古ᄒᆞ며吟咏을일을삼아闲中静里예潜思自得ᄒᆞ야혼자즐겨ᄒᆞ시덧다独乐이일홈称情ᄒᆞᆫ줄긔뉘알리司马温公独乐园이아무려조타ᄒᆞᆫᄃᆞᆯ其间真乐이야이独乐애더로손가寻真을못ᄂᆡᄒᆞ야养真庵의도라드러临风静看ᄒᆞ니ᄂᆡᄯᅳᆺ도莹然ᄒᆞ다退溪先生手笔이真得인줄알리로다观鱼台ᄂᆞ려오니ᄭᆞᆯ온덧ᄒᆞᆫ盘石의杖屦痕이보이ᄂᆞᆫ닷手栽长松은녯빗ᄎᆞᆯᄯᅴ여시니依然物色이긔더옥반가올샤神清气爽ᄒᆞ야芝兰室에든덧ᄒᆞ다多少古迹을보며문득ᄉᆡᆼ각ᄒᆞ니层岩绝壁은云母屏이졀로되야龙眠妙手로그린덧시버러잇고百尺澄潭애天光云影이얼희여ᄌᆞᆷ겨시니光风霁月이부ᄂᆞᆫᄃᆞᆺᄇᆞᄉᆡᄂᆞᆫᄃᆞᆺ鸢飞鱼跃을말업ᄉᆞᆫ벗을삼아沈潜翫索ᄒᆞ야圣贤事业ᄒᆞ시덧다清溪를빗기건너钓矶도宛然ᄒᆞᆯ샤문노라白𩿨들아녜닐을아ᄂᆞ산다严子陵이어ᄂᆡᄒᆡ예汉室로가단말고苔深矶上애暮烟만ᄌᆞᆷ겨셔라春服을ᄉᆡ로입고咏归台에올라오니丽景은古今업서清兴이졀로하니风乎咏而归를오ᄂᆞᆯ다시본ᄃᆞᆺᄒᆞ다台下莲塘의细雨잠ᄭᆞᆫ지ᄂᆡ가니碧玉ᄀᆞᆺᄒᆞᆫ너분닙헤흐ᄎᆡᄂᆞ니明珠로다이러ᄒᆞᆫ清景을보암즉도ᄒᆞ다마ᄂᆞᆫ濂溪가신后에몃몃ᄒᆡ를디ᄂᆡᆫ게오依旧清香이다ᄆᆞᆫ혼자남아고야紫烟이빗긴아래瀑布를멀리보니丹崖노푼긋ᄒᆡ긴ᄂᆡ히걸려ᄂᆞᆫᄃᆞᆺ香炉峯긔어ᄃᆡ오庐山이예롯던가澄心台구어보니鄙吝텃胸襟이새로온ᄃᆞᆺᄒᆞ다마ᄂᆞᆫ寂莫空台예외로이안자시니风清镜面의山影만잠겨잇고绿树阴中에왼갓ᄉᆡ슬피운다徘徊思忆ᄒᆞ며真迹을다차ᄌᆞ니濯缨台渊泉은古今업시말다마ᄂᆞᆫ末路红尘에사ᄅᆞᆷ마다纷竞커든이리조ᄒᆞᆫ清潭애濯缨ᄒᆞᆯ줄긔뉘알리狮子岩노피올라道德山을바라보니玉蕴含辉ᄂᆞᆫ어제론덧ᄒᆞ다마ᄂᆞᆫ凤去山空ᄒᆞ니杜鹃만나죄운다桃花洞ᄂᆞ린물리不舍昼夜ᄒᆞ야落花조차흘러오니天台ᅟᅵᆫ가武陵인가이ᄯᅡ히어ᄃᆡᆫ게오仙踪이아득ᄒᆞ니아모ᄃᆡᆫ줄모ᄅᆞ로다仁者도아닌몸이므ᄉᆞᆷ理를알리마ᄂᆞᆫ乐山忘归ᄒᆞ야奇岩을다시비겨川原远近에景致를살펴보니万紫千红은비단빗치되여잇고众卉群芳은谷风에ᄂᆞᆯ려오고山寺锺声은구ᄅᆞᆷ밧긔들리ᄂᆞ다이러ᄒᆞᆫ形胜을范希文의文笔인들다서ᄂᆡ기쉬울넌가满眼风景이客兴을도오ᄂᆞᆫᄃᆞᆺ任意逍遥ᄒᆞ며짐즉더듸도라오니举目西岑의夕阳이거의로다独乐堂고쳐올나左右를살펴보니先生风彩을亲히만나뵈ᄋᆞᆸᄂᆞᆫᄃᆞᆺ羹墙의俨然ᄒᆞ야俯仰叹息ᄒᆞ며当时ᄒᆞ시던닐다시곰思想ᄒᆞ니明窗静几예世虑을이즈시고圣贤书의着意ᄒᆞ야功效를일워ᄂᆡ여继往开来ᄒᆞ야吾道를발키시니吾东方乐只君子ᄂᆞᆫ다ᄆᆞᆫ인가너기로라ᄒᆞ믈며孝悌를本을삼고忠诚을벱허ᄂᆡ여圣朝의나아들러稷契의몸이되야唐虞盛时를일월가바라더가时运이不幸ᄒᆞ야忠贤을远斥ᄒᆞ니듯ᄂᆞ니보ᄂᆞ니深山穷谷앤들뉘아니悲感ᄒᆞ리七年长沙ᄋᆡ不见天日ᄒᆞ고闭门深省ᄒᆞ샤道德만닷그시니邪不胜正이라公论이졀로이러尊崇道德을사람마다ᄒᆞᆯ줄아라江界ᄂᆞᆫ谪所로ᄃᆡ遗化를못ᄂᆡ이져穷巷绝域의祠宇좃차서워시니士林趋仰이야더옥닐러무엇ᄒᆞ리紫玉泉石우희书院을디어두고济济青襟이弦诵声을이어시니濂洛群贤이이ᄯᅡ희뫼왓ᄂᆞᆫ닷求仁堂도라올라体仁庙도严肃ᄒᆞᆯ샤千秋血食이偶然아닌일이로다追崇尊敬을ᄒᆞᆯ소록못ᄂᆡᄒᆞ야文庙从享이긔더옥盛事로다吾东方文宪이汉唐宋애비긔로쇠紫阳云谷도어즈버여긔로다洗心台ᄂᆞ린물에德泽이이어흘러龙湫감흔곳애神物조차ᄌᆞᆷ겨시니天工造化ㅣ긔더옥奇异코야无边真景을다ᄎᆞᆺ기어려올ᄉᆡ乐而忘返ᄒᆞ야旬月을淹留ᄒᆞ며固陋ᄒᆞᆫ이몸애诚敬을넙이ᄒᆞ야先生文集을仔细히살펴보니千言万语다圣贤의말삼이라道脉工程이日月갓치ᄇᆞᆯ가시니어드운밤길ᄒᆡ明烛잡고옌덧ᄒᆞ다진실로이遗训을腔子里예가ᄃᆞᆨ담아诚意正心ᄒᆞ야修诚을넙게ᄒᆞ면言忠行笃ᄒᆞ야사ᄅᆞᆷ마다어질로다先生遗化至极홈이엇더ᄒᆞ뇨嗟哉后生들아趋仰을더옥놉혀万世千秋에山斗갓치바ᄅᆡ사라天高地厚도有时尽ᄒᆞ려니와独乐堂清风은가업실가ᄒᆞ노라
岭南歌乙亥。李相国谨元按节岭南。布德宣化。视一道如一家。当递。民皆感恩而愿留。故公作歌以赞美之。
编辑岭南千里外에壬辰变后나믄百姓贼路初头에어ᄂᆡ世业가질넌고遗墟芜没ᄒᆞᆫᄃᆡ草屋数间디어두고陈荒薄田을가다얼ᄆᆡ갈리런고ᄀᆞᆺᄃᆞᆨ多事ᄒᆞᆫ듸赋役이나적을넌가朝夕도못내이어饥寒애늘거신들恋主丹心이야어ᄂᆡ刻애이즐넌고白日갓ᄒᆞᆫ圣明이万里밧글다보시니深仁至德으로恻怛ᄒᆞᆫᄯᅳᆺ을두샤巡相阁下를特别이보내시니岭南残民이再生秋아닌온가白玉ᄀᆞᆺ치ᄆᆞᆯ그시고河海ᄀᆞᆺ치깁흔ᄯᅳᆺ에明德新民을一身에일을삼아九经八目을诚敬中에부쳐두고稷契皋陶몸이되야致君尧舜을뵈ᄋᆞᆸ고야말랴너겨承流宣化ᄒᆞ야养民ᄒᆞᆯᄯᅳᆺ을두샤七十州一家삼아父母心을가지시고어미일흘모든赤子如保恩을닙히시니大旱애百谷이时雨를만나ᄂᆞᆫ닷涸辙枯鱼ㅣ깁푼소애잠겨ᄂᆞᆫᄃᆞᆺ千千万万家애德化골오미쳐시니不世情东风이ᄒᆞᆫ빗ᄎᆞ로부ᄂᆞᆫ덧다相国恩波ᄂᆞᆫ견홀ᄃᆡ뇌야업ᄂᆡ农桑을劝ᄒᆞ시며军政도다그시니男耕女织에万民이安业ᄒᆞ고弓矢斯张ᄒᆞ야武备도ᄀᆞ잣ᄂᆞ다ᄒᆞ믈며冰玉精神에霁月胸襟품으시고尽心国事ᄒᆞ야忠诚을다ᄒᆞ시며学校明伦을政事中에大本삼아斯文一事을己任을삼으시니吾道幸甚이时运이아니온가政治이러커니뉘아니感激ᄒᆞ리列邑守令이相国의法을밧아爱民一心이远近업시다ᄀᆞᆺᄒᆞ니엇거제石壕村이武陵桃源되엿ᄂᆞᆫ가竹院松窗애弦诵声을이어거ᄂᆞᆯ绿杨亭畔애击壤歌음불러ᄂᆡ니无怀氏젹사람인가葛天氏ᄯᆡ百姓인가唐虞盛时을오ᄂᆞᆯ다시본ᄃᆞᆺᄒᆞ다许多好讼辈ᄂᆞᆫ어드러로다간게오狱讼이止息ᄒᆞ니囹圄空虚ᄒᆞ단말가民心이感化ᄒᆞ야졀노졀노그러토다必也使无讼을千载下애보아고야公庭이无事ᄒᆞ니村落도일이업다多少行人은男女分明异路ᄒᆞ고西畴处处에耕者让畔ᄒᆞᄂᆞᆫ괴야뭇노라布谷아이ᄯᆞ히어ᄃᆡ오어즈버이몸이周界예드러온ᄃᆞᆺ相国风化아ᄆᆡ도그지업ᄂᆡ召公의德化늣겨寇君一年빌고제라岭南士民들아이내말삼仔细듯소相国恩德을못니즐ᄒᆞᆫ닐ᄒᆞᄉᆡ齐纨를만히사고真彩를가초어더相国风度를司马温公画像갓치无限无限그려ᄂᆡ야岭南千万家애壁上의부쳐두고中心에그리온적이어든보ᄋᆞᆸ고쟈ᄒᆞ노라
芦溪歌
编辑白首에访水寻山太晩ᄒᆞᆫ줄알전마ᄂᆞᆫ平生素志를벱고야말랴너겨赤鼠三春에春服을새로닙고竹杖芒鞋로芦溪깁흔골ᄋᆡᄒᆡᆼ혀마참차ᄌᆞ오니第一江山이님ᄌᆡ업시ᄇᆞ려ᄂᆞ다古往今来예幽人处士들이만히도잇것마ᄂᆞᆫ天悭地秘ᄒᆞ야ᄂᆞ를주랴남겨ᄯᅥᆺ다蹰躇良久타가夕阳이거읜적의陟彼高冈ᄒᆞ야四隅로도라보니玄武朱雀과左右龙虎도그린ᄃᆞᆺ시ᄀᆞ잣고야山脉ᄆᆡᆺ친아ᄅᆡ藏风向阳ᄒᆞᆫᄃᆡ青萝ᄅᆞᆯ허혀드러数椽蜗室을背山临流ᄒᆞ야五柳边에디어두고断岸千尺이가던龙이머무ᄂᆞᆫᄃᆞᆺ江头에둘렷거늘草草亭ᄒᆞᆫ두间을구름ᄯᅴᆫ긴솔아ᄅᆡ바휘디켜여러ᄂᆡ니千态万状이아마도奇异코야峯峦은秀丽ᄒᆞ야富春山이되야잇고流水ᄂᆞᆫ盘回ᄒᆞ야七里滩이되야거든十里明沙ᄂᆞᆫ三月눈이되엿ᄂᆞ다이湖山形胜은견졸ᄃᆡ뇌야업ᄂᆡ巢许도아닌몸애어ᄂᆡ节义알리마ᄂᆞᆫ偶然时来예이名区임ᄌᆡ되여青山流水와明月清风도말업시절로절로어즈러온鸥鹭와数업ᄉᆞᆫ麋鹿도갑업시절로절로沮溺가던묵은밧과严子陵의钓台도갑업시절로절로山中百物이다절로己物되니子陵이둘이오沮溺이서히로다어즈버이몸이아마도怪异코야入山当年에隐君子되얏ᄂᆞᆫ가千古芳名을이ᄒᆞᆫ몸애传토고야人间의이일홈이人力으로일윌소냐山川이灵异ᄒᆞ야도아ᄂᆡᆫ가너기로라中心이莹然ᄒᆞ야世虑절로그처디니光风霁月이腔子里예품엇ᄂᆞᆫᄃᆞᆺ浩然真趣날로새롭ᄒᆞ노왜라飞禽走兽ᄂᆞᆫ六畜이되얏거ᄂᆞᆯ달알ᄋᆡ괴기낙고구ᄅᆞᆷ속의밧흘가라먹고못나마도그칠적은업노왜라无尽ᄒᆞᆫ江山과许多ᄒᆞᆫ闲田은分给子孙ᄒᆞ려이와明月清风은논ᄒᆞ듀기어려올ᄉᆡ才与不才예养志ᄒᆞᄂᆞᆫ아ᄃᆞᆯᄒᆞᆫ아太白渊明证笔에永永别给ᄒᆞ렷로라내의이말이迂阔ᄒᆞᆫᄃᆞᆺᄒᆞ것마ᄂᆞᆫ为子孙计ᄂᆞᆫ다만인가너기로라ᄯᅩ어린이몸은仁者도아니오智者도아니로ᄃᆡ山水에癖이이러늘글ᄉᆞ록더욱ᄒᆞ니져贵ᄒᆞᆫ三公과이江山을밧골소냐어리미친이말을우으리도하렷마ᄂᆞᆫ아므리우어도나ᄂᆞᆫ됴히너기노라ᄒᆞ믈며明时예ᄇᆞ린몸이ᄒᆞ올닐이아조업서世间名利란ᄯᅳᆫ구ᄅᆞᆷ본덧ᄒᆞ고无思无虑ᄒᆞ야物外心만품고이셔이ᄂᆡ生涯을山水间의부텨두고春日이채긴제낙ᄃᆡ를비기쥐고葛巾布衣로钓台예건너오니山雨ᄂᆞᆫ잠ᄭᅡᆫ개고大阳이ᄶᅬ오ᄂᆞᆫᄃᆡᄆᆞᆯ근바람더ᄃᆡ오니镜面이더옥발다김흔돌이다보이니괴기数를알리로다괴기도나치이거놀ᄂᆡᆯ줄모ᄅᆞ거든차마엇디낙글넌고罢钓徘徊ᄒᆞ며波心을구어보니云影天光은얼희여ᄌᆞᆷ겨ᄂᆞᆫᄃᆡ鱼跃于渊을구ᄅᆞᆷ우ᄒᆡ보아고야하문득惊怪ᄒᆞ야俯察仰观ᄒᆞ니上下天이宛然ᄒᆞ다一阵东风에긔엇진渔笛이놉히부러보ᄂᆡ던고江天이寥寂ᄒᆞᆫᄃᆡ반가와도들리ᄂᆞ다临风倚杖ᄒᆞ야左右로도라보니台中清景이아마도萧洒코야물도하ᄂᆞᆯ갓고하ᄂᆞᆯ도물갓ᄒᆞ니碧水长天은ᄒᆞᆫ빗티되얏거든물가애白𩿨ᄂᆞᆫ오ᄂᆞᆫᄃᆞᆺ가ᄂᆞᆫᄃᆞᆺ긋칠줄을모ᄅᆞᄂᆞ다岩畔山花ᄂᆞᆫ锦绣屏이되야잇고涧边垂杨은草绿帐이되야거든良辰佳景을내혼자거ᄂᆞ리고正值花时를虚度치밀냐너겨아희불너하ᄂᆞᆫ말ᄉᆞᆷ이深山穷谷애海错이야보로소냐살진고사리香气ᄒᆞᆫ当归草를猪脯鹿脯相间ᄒᆞ야크나큰细柳笥애洽足히다마두고鲋鱼脍初味예讷鱼生雉서거구어빗빗치드리거든瓦樽에白酒를박잔의가득부어ᄒᆞᆫ잔ᄯᅩᄒᆞᆫ잔醉토록먹은后에桃花ᄂᆞᆫ红雨되야醉面에ᄲᅮᆯ리ᄂᆞᆫᄃᆡ苔矶너븐돌애놉히베고누어시니无怀氏적사ᄅᆞᆷ인가葛天氏ᄯᆡ百姓인가羲皇盛时를다시본가너기로라이힘이뉘힘고圣恩이아니신가江湖애물너신들忧君一念이야어ᄂᆡ刻애이ᄌᆞᆯᄂᆞᆫ고时时로머리드러北辰을ᄇᆞ라보고ᄂᆞᆷ모ᄅᆞᄂᆞᆫ눈물을天一方의디이ᄂᆞ다一生애품은ᄯᅳᆺ을비옵ᄂᆞ다하ᄂᆞ님아山平海渴토록우리圣主万岁소셔煕皥世界예三代日月빗취소셔于千万年에兵革을쉬우소셔耕田凿井에击壤歌를불리소셔이몸은이江山风月에늘글주를모ᄅᆞ로라
五伦歌
编辑父子有亲
编辑아비ᄂᆞᆫ나ᄋᆞ시고어미ᄂᆞᆫ치옵시니昊天罔极이라갑흘길이어려우니大舜의终身诚孝도못다한가ᄒᆞ노라
人生百岁中에疾病이다이시니父母를섬기다몃ᄒᆡ를섬길넌고아마도못다ᄒᆞᆯ诚孝를일즉벼퍼보렷로라
父母섬기기를至诚으로셤기리라鸡鸣에盥漱ᄒᆞ고燠寒을믓ᄌᆞ오며날마다侍侧奉养을没身不衰ᄒᆞ오리라
世上사ᄅᆞᆷ들아父母恩德아ᄂᆞ산다父母곳아니면이몸이이실소냐生死葬祭예礼로ᄡᅥ终始갓게섬겨서라
三千罪恶中에不孝애더니업다夫子의이말ᄉᆞᆷ万古애大法삼아아모려下愚不移도밋처알게ᄒᆞ렷로라
君臣有义
编辑圣恩이罔极ᄒᆞᆫ줄사ᄅᆞᆷ들아아ᄂᆞᄉᆞᆫ다圣恩곳안니면万民이살로소냐이몸은罔极ᄒᆞᆫ圣恩을갑고말려ᄒᆞ노라
稷契도안닌몸애圣恩도罔极ᄒᆞᆯ샤百번을죽어도갑흘닐이업것마ᄂᆞᆫ穷达이길이달나못뫼압고설웟로라
사ᄅᆞᆷ삼기실제君父갓게삼겨시니君父ㅣ一致라轻重을두로소냐이몸은忠孝두사이예늘글주를모ᄅᆞ보라
深山의밤이드니北风이더옥차다玉楼高处에도이ᄇᆞᄅᆞᆷ부ᄂᆞᆫ게오긴밤의치우신가北斗비겨바ᄅᆡ로라
이몸이죽은后에忠诚이넉시되야놉히놉히ᄂᆞ라올라阊阖을블너열고上帝ᄭᅴ우리圣主를寿万岁케비로리라
夫妇有别
编辑夫妇ㅣ이신后에父子兄弟삼겨시니夫妇곳아니면五伦이가즐소냐이中에生民이비롯ᄒᆞ니夫妇크다ᄒᆞ로라
사람내실적의夫妇ᄀᆞᆺ게삼겨시니天定配匹이라夫妇ᄀᆞᆺ치重ᄒᆞᆯ소나百年을아적삼아如鼓瑟琴ᄒᆞ렷로라
夫妇을重타ᄒᆞᆫᄃᆞᆯ情만重케가질것가礼别업시居处ᄒᆞ며恭敬업시조ᄒᆞᆯ소냐一生애敬待如宾을冀缺갓치ᄒᆞ오리라
夫妇삼길적의하重케삼겨시니夫唱妇随ᄒᆞ야一家天地和ᄒᆞ리라날마다举颜齐眉을孟光ᄀᆞᆺ게ᄒᆞ여라
남으로삼긴거시夫妇ᄀᆞᆺ치重ᄒᆞᆯ넌가사ᄅᆞᆷ의百福이夫妇에가잣거든이리重ᄒᆞᆫᄉᆞ이에아니和코엇지ᄒᆞ리
兄弟有爱
编辑兄弟내실적의同气로삼겨시니骨肉至亲이兄弟ᄀᆞᆺ치重ᄒᆞᆯ넌가一生애友爱之情을ᄒᆞᆫ몸ᄀᆞᆺ치ᄒᆞ리라
争财예失性ᄒᆞ야同气不睦마라ᄉᆞ라田地와奴婢ᄂᆞᆫ갑슬주면살련이와아모려万金인들兄弟살ᄃᆡ잇ᄂᆞ냐
友爱를尤笃ᄒᆞ야百年을ᄒᆞᆫᄐᆡ살며ᄒᆞᆫ옷ᄒᆞᆫ밥을논하닙고논하먹고白发애아뮈줄모ᄅᆞ도록ᄒᆞᆷ긔늘쟈ᄒᆞ노라
同气로셋몸되야ᄒᆞᆫ몸가치지ᄂᆡ다가두아은어ᄃᆡ가셔도라올줄모ᄅᆞᄂᆞᆫ고날마다夕阳门外예한숨계워ᄒᆞ노라
友爱깁흔ᄯᅳ지表里업시ᄒᆞᆫᄯᅳᆺ되야이中에和兄弟를우린가너겨ᄯᅥ니엇지라白首只雁이혼자울줄알리오
朋友有信
编辑벗을사괼딘ᄃᆡᆫ有信케사괴리라信업시사괴며恭敬업시지ᄂᆡᆯ소냐一生애久而敬之을始终업게ᄒᆞ오리라
言忠行笃ᄒᆞ고벗사고기삼가오면내몸애辱업고외다ᄒᆞ리적거이와진실로삼가지못ᄒᆞ면辱及其亲ᄒᆞ오리라〈三章缺〉
总论
编辑天地间万物中에사ᄅᆞᆷ이最贵ᄒᆞ니最贵ᄒᆞᆫ바ᄂᆞᆫ五伦이아니온가사ᄅᆞᆷ이五伦을모ᄅᆞ면不远禽兽ᄒᆞ리라
幸兹秉彝心이古今업시다이실ᄉᆡ爰辑旧闻ᄒᆞ야二三篇지어시니嗟哉后生들아살펴보고힘서ᄒᆞ라
仔细히살펴보면뉘아니感激ᄒᆞ리文字ᄂᆞᆫ拙ᄒᆞ되诚敬을삭여시니진실로熟读详味ᄒᆞ면不无一助ᄒᆞ리라
辛酉秋。与郑寒冈浴于蔚山椒井。
编辑神农氏모ᄅᆞᆫ药을이椒井의숨겨던가秋阳이ᄶᅬ오ᄂᆞᆫᄃᆡ물속의잠겨시니曾点의浴沂气像을오ᄂᆞᆯ다시본덧ᄒᆞ다
红尘에ᄯᅳ지업셔斯文을닐을삼아继往开来ᄒᆞ야吾道을발키시니千载后晦庵先生을다시본덧ᄒᆞ여라
立岩时旅轩张先生寓居本郡北立岩。公尝从游。代旅轩作此歌。
编辑无情히서ᄂᆞᆫ바회有情ᄒᆞ야보이ᄂᆞ다最灵ᄒᆞᆫ吾人도直立不倚어렵거ᄂᆞᆯ万古애곳게선저얼구리고칠적이업ᄂᆞ다
江头에屹立ᄒᆞ니仰之예더옥놉다风霜애不变ᄒᆞ니钻之예더옥긋다사람도이바회ᄀᆞᆺᄒᆞ면大丈夫ᅟᅵᆫ가ᄒᆞ노라
卓然直立ᄒᆞ니法바담즉ᄒᆞ다마ᄂᆞᆫ구ᄅᆞᆷ깁흔峡中에알리잇사ᄎᆞ자오랴努力跻攀ᄒᆞ면奇观이야만ᄒᆞ니라
精舍
编辑草屋두세间을岩穴에부쳐두고松竹두빗치病目애익어시니이中에春去秋来를아므젠줄모ᄅᆞ로다
起予岩
编辑夫子의起予者ᄂᆞᆫ商也라드러더니오ᄂᆞᆯ起予者ᄂᆞᆫ말업ᄉᆞᆫ바회로다어리고鄙塞던미암이절로새롭ᄒᆞᄂᆞ다
戒惧台
编辑戒惧台올라오니믄득졀로战兢ᄒᆞ다台上애살펴보며이ᄀᆞᆺ치저홉거든못보고못듯ᄂᆞᆫᄯᅡ히야아니삼가엇지ᄒᆞ리
吐月峯
编辑峯头에소슨ᄃᆞᆯ이이山中의비취노다九万里长天이멀고도놉건마ᄂᆞᆫ高山이插天ᄒᆞ니돌우흐로나ᄂᆞᆫ덧다
九仞峯
编辑巍巍ᄒᆞᆫ九仞峯이众山中에秀异코야下学工程이이山하기갓건마ᄂᆞᆫ엇디라이제为山은功亏一篑ᄒᆞᄂᆞᆫ게오
小鲁岑
编辑南鲁岑이일홈을뉘라서지은게오夫子登临도이东山아니런가万古青山이只么히놉하시니아모ᄃᆡᆫ줄모ᄅᆞ로다
避世台
编辑名利예ᄯᅳ지업서ᄇᆡ오ᄉᆡ막ᄃᆡ집고访水寻山ᄒᆞ야避世台예드러오니어즈버武陵桃源도여긔런가ᄒᆞ로라
合流台
编辑合流台ᄂᆞ린물이보기예有术ᄒᆞ다彼此업시흘러가고左右에逢源ᄒᆞ니分时异合处同을이台下애아라고야
寻真洞
编辑寻真洞ᄂᆞ린물이岩下애구븨지어不舍昼夜ᄒᆞ야亭子압ᄒᆡ드러오니어즈버洛水伊川을다시본ᄃᆞᆺᄒᆞ여라
采药洞
编辑솔알ᄋᆡ아ᄒᆡ들아네얼운어ᄃᆡ가뇨药ᄏᆡ러가시니ᄒᆞ마도라오렷마ᄂᆞᆫ山中에구룸이겁후니간곳몰라ᄒᆞ노라
浴鹤潭
编辑浴鹤潭ᄆᆞᆯ근물에鹤을조차沐浴ᄒᆞ고访花随柳ᄒᆞ야兴을ᄐᆞ고도라오니아무려风乎舞雩咏而归ᅟᅵᆫ들블을일이이시랴
数鱼渊
编辑渊泉이하말그니가ᄂᆞᆫ고기다보닌다一二三四를낫낫치혜리로다童子야새물에고기를다시헤여보아라
响玉桥
编辑矶头에누엇다가ᄭᆡᄃᆞ라니ᄃᆞᆯ이ᄇᆞᆯ다青藜杖빗기집고玉桥를건너오니玉桥애ᄆᆞᆯ근소ᄅᆡ를자ᄂᆞᆫ새만아놋다
钓月滩
编辑낙대를빗기쥐고钓月滩ᄇᆞ라ᄂᆞ려불근역귀헤혀ᄂᆡ고ᄃᆞᆯ알ᄋᆡ안ᄌᆞ시니아모려桐江兴味ᅟᅵᆫᄃᆞᆯ불을주리이시랴
耕云野
编辑沮溺의가던밧치千年을묵어거ᄂᆞᆯ구ᄅᆞᆷ을허혀드러두세이렁가라두고生涯를足다사ᄒᆞᆯ가마ᄂᆞᆫ부ᄅᆞᆯ거ᄉᆞᆫ업노왜라
停云岭
编辑停云岭ᄇᆞ라보니天中에두렷괴야陟彼崔嵬ᄒᆞ면五云蓬莱보련마ᄂᆞᆫ病目애눈물이얼ᄒᆡ니바ᄅᆡ보기아득ᄒᆞ다
产芝岭
编辑产芝岭올나오니一身이香气롭다四皓商山도이芝岭아니런가山路애구룸이깁흐니아모ᄃᆡᆫ줄모ᄅᆞ로다
隔尘岭
编辑隔尘岭하놉흐니红尘이머러간다ᄀᆞᆺ득이먹은귀싯슬ᄉᆞ록먹어가니山밧긔是是非非를듯도보도못ᄒᆞ로다
画里台
编辑江上山ᄂᆞ린긋ᄒᆡ솔아ᄅᆡ너분돌해翠岚丹霞ㅣ叠叠이둘러시니어즈버云母屏风을ᄀᆞᆺ그린ᄃᆞᆺᄒᆞ여라
思亲
编辑霜露既降ᄒᆞ니ᄇᆞᆯ기도凄怆코야이옷시열다ᄒᆞ야치위저허그러ᄒᆞ랴一生애永慕方寸의문득늣겨ᄒᆞ로라
慕贤
编辑반가올샤오ᄂᆞᆯᄭᅮᆷ에首阳隐士보완제고正色愀然ᄒᆞ고날ᄃᆞ려ᄒᆞᄂᆞᆫ말ᄉᆞᆷ至今에叩马ᄒᆞ던忠义를못ᄂᆡ이져ᄒᆞ더라
汨罗ᄂᆞ린물이灵均의怨泪로다为国忠愤을넉시라도못내이저至今에呜咽波声이어제론ᄃᆞᆺᄒᆞ얏ᄂᆞ다
芦洲幽居
编辑어화아ᄒᆡ들아후리치고가자ᄉᆞ라田园이뷔엇거니엇지아니가로소냐道川上明月清风이날기ᄃᆞ리기오ᄅᆡ니라
自警
编辑明镜에틔ᄶᅵ거던갑주고닷글줄아희어룬업시다밋쳐알건마ᄂᆞᆫ갑업시닷글明德을닷글줄을모ᄅᆞᄂᆞ다
诚意关도라드러入德门ᄇᆞ라보니크나큰ᄒᆞᆫ길이넙고도곳다마ᄂᆞᆫ엇지라尽日行人이오도가도아닌게오
九仞山긴슬베혀济世舟를무어ᄂᆡ야길닐흔行人을다건ᄂᆡ려ᄒᆞ엿더니사공도无状ᄒᆞ야暮江头에ᄇᆞ렷ᄂᆞ다