蘆溪先生文集 (朴仁老)/卷三
歌
编辑太平詞戊戌季冬。釜山屯賊。乘夜奔潰。時公佐左兵使成允文幕。兵使聞卽率軍馳到釜山。留十餘日後還到本營。明日。使之作此歌。
编辑나라히偏小ᄒᆞ야海東애ᄇᆞ려셔도箕子遺風이古今업시淳厚ᄒᆞ야二百年來예禮義을崇尙ᄒᆞ니衣冠文物이漢唐宋이되야ᄯᅥ니島夷百萬이一朝애衝突ᄒᆞ야億兆驚魂이칼빗ᄎᆞᆯ조차나니平原에사힌ᄲᅨᄂᆞᆫ뫼두곤노파잇고雄都巨邑은豺狐窟이되얏거ᄂᆞᆯ凄涼玉輦이蜀中으로뵈와드니煙塵이아득ᄒᆞ야日色이열워ᄯᅥ니聖天子神武ᄒᆞ샤一怒를크게내야平壤群兇을一劍下의다버히고風驅南下ᄒᆞ야海口에더져두고窮寇을勿迫ᄒᆞ야몃몃ᄒᆡ를디내연고江左一帶예孤雲갓ᄒᆞᆫ우리물이偶然時來예武侯龍을幸혀만나五德이ᄇᆞᆯ근아래獵狗몸이되야ᄯᅥ가英雄仁勇을喉舌에섯겨시니炎方이稍安ᄒᆞ고士馬精強ᄒᆞ야ᄯᅥ니皇朝一夕에大風이다시이니龍ᄀᆞᆺᄒᆞᆫ將帥와구름ᄀᆞᆺᄒᆞᆫ勇士들이旌旗蔽空ᄒᆞ야萬里예이어시니兵聲이大振ᄒᆞ야山岳을ᄯᅴ엿ᄂᆞᆫᄃᆞᆺ兵房御營大將은先鋒을引導ᄒᆞ야賊陣에突擊ᄒᆞ니疾風大雨에霹靂이즈ᄎᆡᄂᆞᆫᄃᆞᆺ淸正小豎頭도掌中에잇것마ᄂᆞᆫ天雨爲祟ᄒᆞ야士卒이疲困커ᄂᆞᆯ져근ᄃᆞᆺ解圍ᄒᆞ야士氣을쉬우더가賊徒ㅣ犇潰ᄒᆞ니못다잡아말년졔고窟穴을구어보니구든덧도ᄒᆞ다마ᄂᆞᆫ有敗灰燼ᄒᆞ니不在險을알니로다上帝聖德과吾王沛澤이遠近업시미쳐시니天誅猾賊ᄒᆞ야仁義를돕ᄂᆞᆫᄯᅩ다海不揚波이졘가너기로라無狀ᄒᆞᆫ우리물도臣子되야이셔더가君恩을못갑흘가敢死心을가져이셔七載를奔走터가太平오ᄂᆞᆯ보완디고投兵息戈ᄒᆞ고細柳營도라들제太平簫노픈솔의예鼓角이섯겨시니水宮깁흔곳의魚龍이다우ᄂᆞᆫᄃᆞᆺ龍旗偃蹇ᄒᆞ야西風에빗겨시니五色祥雲一片이半空애ᄯᅥ러딘ᄃᆞᆺ太平模樣이더옥ᄒᆞ나반가올사揚弓擧矢ᄒᆞ고凱歌를아뤼오니爭唱歡聲이碧空애얼ᄒᆡᄂᆞ다三尺霜刃을興氣계워둘러메고仰面長嘯ᄒᆞ야춤을추려이러셔니天寶龍光이斗牛間의소이ᄂᆞ다手之舞之足之蹈之절노절노즐거오니歌七德舞七德을그칠줄모ᄅᆞ로다人間樂事ㅣ이ᄀᆞᆺᄒᆞ니ᄯᅩ인ᄂᆞᆫ가華山이어ᄃᆡ오이말을보내고져天山이어ᄃᆡ오이활을노피거쟈이제야ᄒᆞ올일이忠孝一事ᄲᅮᆫ이로다營中에일이업셔긴ᄌᆞᆷ드러누어시니뭇노라이날이어ᄂᆡ적고羲皇盛時를다시본가너기로랴天無淫雨ᄒᆞ니白日이더욱ᄇᆞᆯ다白日이ᄇᆞᆯ그니萬方애비최노다處處溝壑애흐터잇던老羸드리東風新燕가치舊巢을ᄎᆞ자오니首邱初心에뉘아니반겨ᄒᆞ리爰居爰處에즐거옴이엇더ᄒᆞᆫ뇨孑遺生靈들아聖恩인줄아ᄂᆞᄉᆞᆫ다聖恩이기픈아ᄅᆡ五倫을발켜ᄉᆞ라敎訓生聚ㅣ라졀로아니닐어가랴天運循環을아옵게다하ᄂᆞ님아佑我邦國ᄒᆞ샤萬世無疆눌리소셔唐虞天地예三代日月비최소셔於萬斯年에兵革을그치소셔耕田鑿井에擊壤歌을불니소셔우리도聖主을뫼ᄋᆞᆸ고同樂太平ᄒᆞ오리라
莎堤曲莎堤。地名。在龍津江東距五里許。卽漢陰李相公江亭所在處也。公代相公作此曲。
编辑어리고拙ᄒᆞᆫ몸애榮寵이已極ᄒᆞ니鞠躬盡瘁ᄒᆞ야죽어야말녀너겨夙夜匪懈ᄒᆞ야밤을닛고思度ᄒᆞᆫᄃᆞᆯ관솔의현불로日月明을도올ᄂᆞᆫ가尸位伴食을몃ᄒᆡ나지내연고늘고病이드러骸骨를빌리실ᄉᆡ漢水東ᄯᅡ흐로訪水尋山ᄒᆞ야龍津江디내올나莎堤안도라드니第一江山이임ᄌᆡ업시ᄇᆞ려ᄂᆞ다平生夢想이오라ᄒᆞ야그러턴지水光山色이녯ᄂᆞᆺᄎᆞᆯ다시본ᄃᆞᆺ無情ᄒᆞᆫ山水도有情ᄒᆞ야보이ᄂᆞ다白沙汀畔의落霞을빗기ᄯᅴ고三三五五히섯거노ᄂᆞᆫ뎌白鷗야너ᄃᆞ려말뭇쟈놀ᄂᆡ디마라ᄉᆞ라이名區勝地을어ᄃᆡ라드러ᄯᅥᆫ다碧波ㅣ洋洋ᄒᆞ니渭水伊川아닌게오層巒이兀兀ᄒᆞ니富春箕山아닌게오林深路黑ᄒᆞ니晦翁雲谷아닌게오泉甘土肥ᄒᆞ니李愿盤谷아닌게오徘徊思憶호ᄃᆡ아모ᄃᆡᆫ줄내몰내라岸芝汀蘭은淸香이郁郁ᄒᆞ야遠近에이어잇고南澗東溪예落花ㅣᄀᆞᄃᆞᆨᄌᆞᆷ겨거ᄂᆞᆯ荊棘을헤혀드러草屋數間지어두고鶴髮을뫼지고終孝를ᄒᆞ려너겨爰居爰處ᄒᆞ니此江山之임재로다三公不換此江山을오ᄂᆞᆯᄉᆞ아라고야어즈러온鷗鷺와數업ᄉᆞᆫ麋鹿을내혼자거ᄂᆞ려六畜을삼아거든갑업ᄉᆞᆫ淸風明月은절노己物되야시니ᄂᆞᆷ과다ᄅᆞᆫ富貴는이ᄒᆞᆫ몸애ᄀᆞ자ᄭᅩ야이富貴가지고져富貴부를소냐부를줄모ᄅᆞ거든사괼줄알리넌가紅塵도머러가니世事을듯볼소냐花開葉落아니면어ᄂᆡ節을알리런고中隱菴쇠붑소ᄅᆡ谷風의섯거ᄂᆞ라梅牕의이르거든午睡를ᄀᆞᆺᄭᆡ야病目을여러보니밤비예ᄀᆞᆺ핀가지暗香을보내여봄쳘을알외ᄂᆞ다春服을쳐엄닙고麗景이더듼져긔靑藜杖빗기쥐고童子六七불너내야속닙난잔ᄯᅬ예足容重케흣거러淸江의발을싯고風乎江畔ᄒᆞ야興을타고도라오니舞雩詠而歸ᄅᆞᆯ져그나부ᄅᆞᆯ소냐春興이이러커든秋興이라져글넌가金風이瑟瑟ᄒᆞ야庭畔애지ᄂᆡ부니머괴입지ᄂᆞᆫ소ᄅᆡ먹은귀를놀ᄅᆡᄂᆞ다正値秋風을中心에더욱반겨낙ᄃᆡ을둘러메고紅蓼을헤혀도러小艇을글러노화風帆浪楫으로가ᄂᆞᆫᄃᆡ로더뎌두니流下前灘ᄒᆞ야淺水邊에오도고야夕陽이거읜젹의江風이짐즉부러歸帆을보ᄂᆡᄂᆞᆫᄃᆞᆺ아ᄃᆞᆨᄃᆞᆫ前山도忽後山의보이ᄂᆞ다須臾羽化ᄒᆞ야蓮葉舟에올나ᄂᆞᆫᄃᆞᆺ東坡赤壁遊ᅟᅵᆫᄃᆞᆯ이내興에엇지더며張翰江東去ᅟᅵᆫᄃᆞᆯ오ᄂᆞᆯ景에미ᄎᆞᆯ넌가居水에이러커든居山이라偶然ᄒᆞ랴山房의秋晩커ᄂᆞᆯ幽懷를둘ᄃᆡ업서雲吉山돌길ᄒᆡ막ᄃᆡ집고쉬여올나任意逍遙ᄒᆞ며猿鶴을벗을삼아喬松을비기여四隅로도라보니天工이工巧ᄒᆞ야묏빗ᄎᆞᆯᄭᅮᆷ이ᄂᆞᆫ가흰구ᄅᆞᆷ말근ᄂᆡᄂᆞᆫ片片이ᄯᅥ여나라노푸락나지락峯峯谷谷이面面에버럿ᄭᅥ든서리친신남기봄ᄭᅩᆺ도곤불거시니錦繡屛風을疊疊이둘너ᄂᆞᆫᄃᆞᆺ千態萬狀이僭濫ᄒᆞ야보이ᄂᆞ다힘세이다토면내분에올가마ᄂᆞᆫ禁ᄒᆞ리업ᄉᆞᆯᄉᆡ나도두고즐기노라ᄒᆞ물며南山ᄂᆞ린긋ᄒᆡ五穀을가초심거먹고못남아도긋지나아니ᄒᆞ면내집의내밥이그맛시엇더ᄒᆞ뇨採山釣水ᄒᆞ니水陸品도잠ᄭᅡᆫᄀᆞᆺ다甘旨奉養을足다사ᄒᆞᆯ가마ᄂᆞᆫ烏鳥含情을벱고야말녓노라私情이이러ᄒᆞ야아직물러나와신ᄃᆞᆯ罔極ᄒᆞᆫ聖恩을어ᄂᆡ刻애이질넌고犬馬微誠은白首에야더옥깁다時時로머리드러北辰을ᄇᆞ라보니ᄂᆞᆷ모ᄅᆞᄂᆞᆫ눈물이두사ᄆᆡ예다졋ᄂᆞ다이눈물보건ᄃᆡᆫ참아물너날ᄭᅡ마ᄂᆞᆫᄀᆞᆺᄃᆞᆨᄒᆞᆫ不才예病ᄒᆞ나디터가고萱堂老親은八旬이거의거든湯藥을그치며定省을뷔울넌가이ᄌᆡ야어ᄂᆡᄉᆞ예이山밧긔날오소냐許由의시슨귀예老萊子의오ᄉᆞᆯ입고압뫼예져솔이풀은쇠되도록함긔뫼셔늘그리라
陋巷詞公從遊漢陰相公。相公問公山居窮苦之狀。公乃述己懷作此曲。
编辑어리고迂闊ᄒᆞᆯ산이ᄂᆡ우ᄒᆡ더니업다吉凶禍福을하날긔부쳐두고陋巷깁푼곳의草幕을지어두고風朝雨夕에석은딥히셥히되야셔홉밥닷홉粥에煙氣도하도할샤설데인熟冷애뷘ᄇᆡ쇡일ᄲᅮᆫ이로다生涯이러ᄒᆞ다丈夫ᄯᅳᆺ을옴길넌가安貧一念을젹을망졍품고이셔隨宜로살려ᄒᆞ니날로조차齟齬ᄒᆞ다ᄀᆞᄋᆞᆯ히不足거든봄이라有餘ᄒᆞ며주머니뷔엿거든甁의라담겨시랴貧困ᄒᆞᆫ人生이天地間의나ᄲᅮᆫ이라飢寒이切身ᄒᆞ다一丹心을이질ᄂᆞᆫ가奮義忘身ᄒᆞ야죽어야말녀너겨于橐于囊의줌줌이모와녀코兵戈五載예敢死心을가져이셔履尸涉血ᄒᆞ야몃百戰을지ᄂᆡ연고一身이餘暇잇사一家를도라보랴一奴長鬚ᄂᆞᆫ奴主分을이졋거든告余春及을어ᄂᆡ사이ᄉᆡᆼ각ᄒᆞ리耕當問奴ᅟᅵᆫᄃᆞᆯ눌ᄃᆞ려물ᄅᆞᆯᄂᆞᆫ고躬耕稼穡이ᄂᆡ分인줄알리로다莘野耕叟와壟上耕翁을賤타ᄒᆞ리업것마ᄂᆞᆫ아므려갈고젼ᄃᆞᆯ어ᄂᆡ쇼로갈로손고旱旣太甚ᄒᆞ야時節이다느즌졔西疇놉흔논애잠ᄭᅡᆫᄀᆡᆫ녈비예道上無源水을반만ᄭᅡᆫᄃᆡ혀두고쇼ᄒᆞᆫ젹듀마ᄒᆞ고엄섬이ᄒᆞᄂᆞᆫ말삼親切호라너건집의달업슨黃昏의허위허위다라가셔구디다ᄃᆞᆫ門밧긔어득히혼자서셔큰기ᄎᆞᆷ아함이를良久토록ᄒᆞ온後에어화긔뉘신고廉恥업산ᄂᆡ옵노라初更도거읜ᄃᆡ긔엇지와겨신고年年에이러ᄒᆞ기苟且ᄒᆞᆫ줄알건만ᄂᆞᆫ쇼업ᄉᆞᆫ窮家애혜염만하왓삽노라공ᄒᆞ니나갑시나주엄즉도ᄒᆞ다마ᄂᆞᆫ다만어제밤의거빈집져사람이목불근수기雉을玉脂泣게ᄭᅮ어ᄂᆡ고간이근三亥酒을醉토록勸ᄒᆞ거든이러한恩惠을어이아니갑흘넌고來日로주마ᄒᆞ고큰言約ᄒᆞ야거든失約이未便ᄒᆞ니사셜이어려왜라實爲그러ᄒᆞ면혈마어이할고헌먼덕수기스고측업슨집신에설피설피물너오니風彩저근形容애ᄀᆡ즈칠ᄲᅮᆫ이로다蝸室에드러간ᄃᆞᆯ잠이와사누어시랴北牕을비겨안자ᄉᆡᄇᆡᄅᆞᆯ기다리니無情ᄒᆞᆫ戴勝은이ᄂᆡ恨을도우ᄂᆞ다終朝惆悵ᄒᆞ며먼들흘바라보니즐기ᄂᆞᆫ農歌도興업서들리ᄂᆞ다世情모ᄅᆞᆫ한숨은그칠줄을모ᄅᆞᄂᆞ다아ᄭᆞ온져소뷔ᄂᆞᆫ볏보님도됴ᄒᆞᆯ세고가시엉긘묵은밧도容易케갈련마ᄂᆞᆫ虛堂半壁에슬듸업시걸려고야春耕도거의거다후리쳐더뎌두쟈江湖ᄒᆞᆫᄭᅮᆷ을ᄭᅮ언지도오ᄅᆡ러니口腹이爲累ᄒᆞ야어지버이져ᄯᅥ다瞻彼淇澳혼ᄃᆡ綠竹도하도할샤有斐君子들아낙ᄃᆡᄒᆞ나빌려ᄉᆞ라蘆花깁픈곳애明月淸風벗이되야님ᄌᆡ업ᄉᆞᆫ風月江山애절로절로늘그리라無心ᄒᆞᆫ白鷗야오라ᄒᆞ며말라ᄒᆞ랴다토리업슬ᄉᆞᆫ다문인가너기로라無狀ᄒᆞᆫ이몸애무슨志趣이스리마ᄂᆞᆫ두세이렁밧논를다무겨더뎌두고이시면粥이오업시면굴물망졍남의집남의거슨젼혀부러말렷노라ᄂᆡ貧賤슬히너겨손을헤다물너가며남의富貴불리너겨손을치다나아오랴人間어ᄂᆡ일이命밧긔삼겨시리貧而無怨을어렵다ᄒᆞ건마ᄂᆞᆫᄂᆡ生涯이러호ᄃᆡ설온ᄯᅳᆺ은업노왜라簞食瓢飮을이도足히너기로라平生ᄒᆞᆫᄯᅳᆺ이溫飽애ᄂᆞᆫ업노왜라太平天下애忠孝를일을삼아和兄弟信朋友외다ᄒᆞ리뉘이시리그밧긔남은일이야삼긴ᄃᆡ로살렷노라
早紅柹歌辛丑九月初。漢陰相公饋公早紅柹。公因時物有感而作。
编辑盤中早紅감이고아도보이ᄂᆞ다柚子안이라도품엄즉도ᄒᆞ다마ᄂᆞᆫ품어가반기리업슬ᄉᆡ글노설워ᄒᆞᄂᆞ이다
王祥의鯉魚잡고孟宗의竹筍ᄭᅥᆨ거검던멀리희도록老萊子의오ᄉᆞᆯ입고一生애養志誠孝를曾子ᄀᆞᆺ치ᄒᆞ리이다
萬勻을늘려내야길게길게노흘ᄭᅩ아九萬里長天에가ᄂᆞᆫᄒᆡ를자바ᄆᆡ야北堂의鶴髮雙親을더듸늘게ᄒᆞ리이다
群鳳모다신듸외가마기드러오니白玉사힌곳애돌ᄒᆞᆫ아갓다마ᄂᆞᆫ두어라鳳凰도飛鳥와類시니뫼셔논ᄃᆞᆯ엇더ᄒᆞ리
○莎堤曲。何爲而作也。昔在辛亥春。曾祖考漢陰相公退老。與朴蘆溪仁老述懷之曲也。世代旣遠。此曲無傳。恐其泯沒於後。竊嘗慨然於心者稔矣。不肖孫允文。是歲庚午春。除永川郡守。公卽茲土人也。其曲尙今流傳。其孫亦且生存。公餘月夕。以其孫進善命歌而聽之。怳若後生叨陪杖屨於龍津山水之間。愴懷益激。感淚自零。幷與陋巷及短歌四章而付諸剞劂氏。以圖廣傳焉。時是年三月三日也。〈板在本郡。而今失。〉
船上歎時。國家尙憂南陲。選公統舟師。赴防釜山。公臨船作此曲。
编辑늘고病든몸을舟師로보ᄂᆡ실ᄉᆡ乙巳三夏애鎭東營ᄂᆞ려오니關防重地예病이깁다안자실랴一長劍비기ᄎᆞ고兵船에구테올나勵氣瞋目ᄒᆞ야對馬島을구어보니ᄇᆞ람조친黃雲은遠近에사혀잇고아득ᄒᆞᆫ滄波ᄂᆞᆫ긴하ᄂᆞᆯ과ᄒᆞᆫ빗칠쇠船上에徘徊ᄒᆞ며古今을思憶ᄒᆞ고어리미친懷抱애軒轅氏를애ᄃᆞ노라大洋이茫茫ᄒᆞ야天地예둘려시니진실로ᄇᆡ아니면風波萬里밧긔어ᄂᆡ四夷엿볼넌고무ᄉᆞᆷ일ᄒᆞ려ᄒᆞ야ᄇᆡ못기를비롯ᄒᆞᆫ고萬世千秋에ᄀᆞ업ᄉᆞᆫ큰弊되야普天之下애萬民怨길우ᄂᆞ다어즈버ᄭᆡᄃᆞ라니秦始皇의타시로다ᄇᆡ비록잇다ᄒᆞ나倭를아니삼기던들日本對馬島로뷘ᄇᆡ졀로나올넌가뉘말을미더듯고童男童女를그ᄃᆡ도록드려다가海中모든셤에難當賊을기쳐두고痛憤ᄒᆞᆫ羞辱이華夏애다밋나다長生不死藥을얼ᄆᆡ나어더ᄂᆡ여萬里長城놉히사고몃萬年을사도ᄯᅥᆫ고ᄂᆞᆷᄃᆡ로죽어가니有益ᄒᆞᆫ줄모ᄅᆞ로다어즈버ᄉᆡᆼ각ᄒᆞ니徐巿等이已甚ᄒᆞ다人臣이되야셔亡命도ᄒᆞᄂᆞᆫ것가神仙을못보거든수이나도라오면舟師이시럼은견혀업게삼길럿다두어라旣往不咎라일너무엇ᄒᆞ로소니쇽졀업ᄉᆞᆫ是非를후리쳐더뎌두쟈潛思覺寤ᄒᆞ니내ᄯᅳᆺ도固執고야黃帝作舟車ᄂᆞᆫ왼줄도모ᄅᆞ로다張翰江東애秋風을만나신들扁舟곳아니타면天淸海闊ᄒᆞ다어ᄂᆡ興이졀로나며三公도아니밧골第一江山애浮萍ᄀᆞᆺᄒᆞᆫ漁父生涯을一葉舟아니면어ᄃᆡ부쳐ᄃᆞᆫ힐ᄂᆞᆫ고일언닐보건ᄃᆡᆫᄇᆡ삼긴制度야至妙ᄒᆞᆫ덧ᄒᆞ다마ᄂᆞᆫ엇디ᄒᆞᆫ우리물은ᄂᆞᄂᆞᆫᄃᆞᆺᄒᆞᆫ板屋船을晝夜의빗기ᄐᆞ고臨風咏月호ᄃᆡ興이젼혀업ᄂᆞᆫ게오昔日舟中에ᄂᆞᆫ杯盤이狼籍터니今日舟中에ᄂᆞᆫ大劍長鎗ᄲᅮᆫ이로다ᄒᆞᆫ가지ᄇᆡ언마ᄂᆞᆫ가진ᄇᆡ다라니其間憂樂이서로ᄀᆞᆺ지못ᄒᆞ도다時時로멀이드러北辰울ᄇᆞ라보며傷時老淚ᄅᆞᆯ天一方의디이ᄂᆞ다吾東方文物이漢唐宋애디랴마ᄂᆞᆫ國運이不幸ᄒᆞ야海醜兇謀애萬古羞을안고이셔百分애ᄒᆞᆫ가지도못시셔ᄇᆞ려거든이몸이無狀ᄒᆞᆫᄃᆞᆯ臣子ㅣ되야이셔다가窮達이길이달라몬뫼ᄋᆞᆸ고늘거신ᄃᆞᆯ憂國丹心이야어ᄂᆡ刻애이즐넌고慷慨계운壯氣ᄂᆞᆫ老當益壯ᄒᆞ다마ᄂᆞᆫ됴고마ᄂᆞᆫ이몸이病中에드러시니雪憤伸冤이어려올ᄃᆞᆺᄒᆞ건마ᄂᆞᆫ그러나死諸葛도生仲達을멀리좃고발업ᄉᆞᆫ孫臏도龐涓을잡아거든ᄒᆞ믈며이몸은手足이ᄀᆞ자잇고命脈이이어시니鼠竊狗偸을저그나저흘소냐飛船에ᄃᆞᆯ려드러先鋒을거치면九十月霜風에落葉가치헤치리라七縱七禽을우린ᄃᆞᆯ못ᄒᆞᆯ것가蠢彼島夷들아수이乞降ᄒᆞ야ᄉᆞ라降者不殺이니너를구ᄐᆡ殲滅ᄒᆞ랴吾王聖德이欲幷生ᄒᆞ시니라太平天下애堯舜君民되야이셔日月光華ᄂᆞᆫ朝復朝ᄒᆞ얏거든戰船ᄐᆞ던우리몸도漁舟에唱晩ᄒᆞ고秋月春風에놉히베고누어이셔聖代海不揚波ᄅᆞᆯ다시보려ᄒᆞ노라
獨樂堂在慶州玉山。卽晦齋李先生所居堂也。公往尋遺躅。因作此歌。
编辑紫玉山名勝地예獨樂堂이蕭灑홈을들런디오래로ᄃᆡ이몸이武夫로서海邊事ㅣ孔棘거ᄂᆞᆯ一片丹心에奮義를못내ᄒᆞ야金鎗鐵馬로餘暇업시奔走터가中心景仰이白首에더옥깁허竹杖芒鞋로오날사ᄎᆞ자오니峯巒은秀麗ᄒᆞ야武夷山이되여잇고流水ᄂᆞᆫ盤回ᄒᆞ야後伊川이되엿ᄂᆞ다이러ᄒᆞᆫ名區에임ᄌᆡ어이업도ᄯᅥᆫ고一千年新羅와五百載高麗에賢人君子들이만히도지ᄂᆡᆫ마ᄂᆞᆫ天慳地秘ᄒᆞ야我先生ᄭᆡ기치도다物各有主ㅣ어든ᄃᆞ토리이실소냐靑蘿를헤혀드러獨樂堂을여러ᄂᆡ니幽閑景致ᄂᆞᆫ견홀ᄃᆡ뇌야업ᄂᆡ千竿脩竹은碧溪조차둘너잇고萬卷書冊은四壁의사혀시니顏曾이在左ᄒᆞ고游夏ᄂᆞᆫ在右ᄒᆞᆫᄃᆞᆺ尙友千古ᄒᆞ며吟詠을일을삼아閒中靜裏예潛思自得ᄒᆞ야혼자즐겨ᄒᆞ시덧다獨樂이일홈稱情ᄒᆞᆫ줄긔뉘알리司馬溫公獨樂園이아무려조타ᄒᆞᆫᄃᆞᆯ其間眞樂이야이獨樂애더로손가尋眞을못ᄂᆡᄒᆞ야養眞菴의도라드러臨風靜看ᄒᆞ니ᄂᆡᄯᅳᆺ도瑩然ᄒᆞ다退溪先生手筆이眞得인줄알리로다觀魚臺ᄂᆞ려오니ᄭᆞᆯ온덧ᄒᆞᆫ盤石의杖屨痕이보이ᄂᆞᆫ닷手栽長松은녯빗ᄎᆞᆯᄯᅴ여시니依然物色이긔더옥반가올샤神淸氣爽ᄒᆞ야芝蘭室에든덧ᄒᆞ다多少古跡을보며문득ᄉᆡᆼ각ᄒᆞ니層巖絶壁은雲母屛이졀로되야龍眠妙手로그린덧시버러잇고百尺澄潭애天光雲影이얼희여ᄌᆞᆷ겨시니光風霽月이부ᄂᆞᆫᄃᆞᆺᄇᆞᄉᆡᄂᆞᆫᄃᆞᆺ鳶飛魚躍을말업ᄉᆞᆫ벗을삼아沈潛翫索ᄒᆞ야聖賢事業ᄒᆞ시덧다淸溪를빗기건너釣磯도宛然ᄒᆞᆯ샤문노라白𩿨들아녜닐을아ᄂᆞ산다嚴子陵이어ᄂᆡᄒᆡ예漢室로가단말고苔深磯上애暮煙만ᄌᆞᆷ겨셔라春服을ᄉᆡ로입고詠歸臺에올라오니麗景은古今업서淸興이졀로하니風乎詠而歸를오ᄂᆞᆯ다시본ᄃᆞᆺᄒᆞ다臺下蓮塘의細雨잠ᄭᆞᆫ지ᄂᆡ가니碧玉ᄀᆞᆺᄒᆞᆫ너분닙헤흐ᄎᆡᄂᆞ니明珠로다이러ᄒᆞᆫ淸景을보암즉도ᄒᆞ다마ᄂᆞᆫ濂溪가신後에몃몃ᄒᆡ를디ᄂᆡᆫ게오依舊淸香이다ᄆᆞᆫ혼자남아고야紫煙이빗긴아래瀑布를멀리보니丹崖노푼긋ᄒᆡ긴ᄂᆡ히걸려ᄂᆞᆫᄃᆞᆺ香爐峯긔어ᄃᆡ오廬山이예롯던가澄心臺구어보니鄙吝텃胸襟이새로온ᄃᆞᆺᄒᆞ다마ᄂᆞᆫ寂莫空臺예외로이안자시니風淸鏡面의山影만잠겨잇고綠樹陰中에왼갓ᄉᆡ슬피운다徘徊思憶ᄒᆞ며眞跡을다차ᄌᆞ니濯纓臺淵泉은古今업시말다마ᄂᆞᆫ末路紅塵에사ᄅᆞᆷ마다紛競커든이리조ᄒᆞᆫ淸潭애濯纓ᄒᆞᆯ줄긔뉘알리獅子巖노피올라道德山을바라보니玉蘊含輝ᄂᆞᆫ어제론덧ᄒᆞ다마ᄂᆞᆫ鳳去山空ᄒᆞ니杜鵑만나죄운다桃花洞ᄂᆞ린물리不舍晝夜ᄒᆞ야落花조차흘러오니天台ᅟᅵᆫ가武陵인가이ᄯᅡ히어ᄃᆡᆫ게오仙蹤이아득ᄒᆞ니아모ᄃᆡᆫ줄모ᄅᆞ로다仁者도아닌몸이므ᄉᆞᆷ理를알리마ᄂᆞᆫ樂山忘歸ᄒᆞ야奇巖을다시비겨川原遠近에景致를살펴보니萬紫千紅은비단빗치되여잇고衆卉群芳은谷風에ᄂᆞᆯ려오고山寺鍾聲은구ᄅᆞᆷ밧긔들리ᄂᆞ다이러ᄒᆞᆫ形勝을范希文의文筆인들다서ᄂᆡ기쉬울넌가滿眼風景이客興을도오ᄂᆞᆫᄃᆞᆺ任意逍遙ᄒᆞ며짐즉더듸도라오니擧目西岑의夕陽이거의로다獨樂堂고쳐올나左右를살펴보니先生風彩을親히만나뵈ᄋᆞᆸᄂᆞᆫᄃᆞᆺ羹墻의儼然ᄒᆞ야俯仰歎息ᄒᆞ며當時ᄒᆞ시던닐다시곰思想ᄒᆞ니明牕靜几예世慮을이즈시고聖賢書의着意ᄒᆞ야功效를일워ᄂᆡ여繼往開來ᄒᆞ야吾道를발키시니吾東方樂只君子ᄂᆞᆫ다ᄆᆞᆫ인가너기로라ᄒᆞ믈며孝悌를本을삼고忠誠을벱허ᄂᆡ여聖朝의나아들러稷契의몸이되야唐虞盛時를일월가바라더가時運이不幸ᄒᆞ야忠賢을遠斥ᄒᆞ니듯ᄂᆞ니보ᄂᆞ니深山窮谷앤들뉘아니悲感ᄒᆞ리七年長沙ᄋᆡ不見天日ᄒᆞ고閉門深省ᄒᆞ샤道德만닷그시니邪不勝正이라公論이졀로이러尊崇道德을사람마다ᄒᆞᆯ줄아라江界ᄂᆞᆫ謫所로ᄃᆡ遺化를못ᄂᆡ이져窮巷絶域의祠宇좃차서워시니士林趨仰이야더옥닐러무엇ᄒᆞ리紫玉泉石우희書院을디어두고濟濟靑襟이絃誦聲을이어시니濂洛群賢이이ᄯᅡ희뫼왓ᄂᆞᆫ닷求仁堂도라올라體仁廟도嚴肅ᄒᆞᆯ샤千秋血食이偶然아닌일이로다追崇尊敬을ᄒᆞᆯ소록못ᄂᆡᄒᆞ야文廟從享이긔더옥盛事로다吾東方文憲이漢唐宋애비긔로쇠紫陽雲谷도어즈버여긔로다洗心臺ᄂᆞ린물에德澤이이어흘러龍湫감흔곳애神物조차ᄌᆞᆷ겨시니天工造化ㅣ긔더옥奇異코야無邊眞景을다ᄎᆞᆺ기어려올ᄉᆡ樂而忘返ᄒᆞ야旬月을淹留ᄒᆞ며固陋ᄒᆞᆫ이몸애誠敬을넙이ᄒᆞ야先生文集을仔細히살펴보니千言萬語다聖賢의말삼이라道脈工程이日月갓치ᄇᆞᆯ가시니어드운밤길ᄒᆡ明燭잡고옌덧ᄒᆞ다진실로이遺訓을腔子裏예가ᄃᆞᆨ담아誠意正心ᄒᆞ야修誠을넙게ᄒᆞ면言忠行篤ᄒᆞ야사ᄅᆞᆷ마다어질로다先生遺化至極홈이엇더ᄒᆞ뇨嗟哉後生들아趨仰을더옥놉혀萬世千秋에山斗갓치바ᄅᆡ사라天高地厚도有時盡ᄒᆞ려니와獨樂堂淸風은가업실가ᄒᆞ노라
嶺南歌乙亥。李相國謹元按節嶺南。布德宣化。視一道如一家。當遞。民皆感恩而願留。故公作歌以讚美之。
编辑嶺南千里外에壬辰變後나믄百姓賊路初頭에어ᄂᆡ世業가질넌고遺墟蕪沒ᄒᆞᆫᄃᆡ草屋數間디어두고陳荒薄田을가다얼ᄆᆡ갈리런고ᄀᆞᆺᄃᆞᆨ多事ᄒᆞᆫ듸賦役이나적을넌가朝夕도못내이어飢寒애늘거신들戀主丹心이야어ᄂᆡ刻애이즐넌고白日갓ᄒᆞᆫ聖明이萬里밧글다보시니深仁至德으로惻怛ᄒᆞᆫᄯᅳᆺ을두샤巡相閤下를特別이보내시니嶺南殘民이再生秋아닌온가白玉ᄀᆞᆺ치ᄆᆞᆯ그시고河海ᄀᆞᆺ치깁흔ᄯᅳᆺ에明德新民을一身에일을삼아九經八目을誠敬中에부쳐두고稷契皐陶몸이되야致君堯舜을뵈ᄋᆞᆸ고야말랴너겨承流宣化ᄒᆞ야養民ᄒᆞᆯᄯᅳᆺ을두샤七十州一家삼아父母心을가지시고어미일흘모든赤子如保恩을닙히시니大旱애百穀이時雨를만나ᄂᆞᆫ닷涸轍枯魚ㅣ깁푼소애잠겨ᄂᆞᆫᄃᆞᆺ千千萬萬家애德化골오미쳐시니不世情東風이ᄒᆞᆫ빗ᄎᆞ로부ᄂᆞᆫ덧다相國恩波ᄂᆞᆫ견홀ᄃᆡ뇌야업ᄂᆡ農桑을勸ᄒᆞ시며軍政도다그시니男耕女織에萬民이安業ᄒᆞ고弓矢斯張ᄒᆞ야武備도ᄀᆞ잣ᄂᆞ다ᄒᆞ믈며氷玉精神에霽月胸襟품으시고盡心國事ᄒᆞ야忠誠을다ᄒᆞ시며學校明倫을政事中에大本삼아斯文一事을己任을삼으시니吾道幸甚이時運이아니온가政治이러커니뉘아니感激ᄒᆞ리列邑守令이相國의法을밧아愛民一心이遠近업시다ᄀᆞᆺᄒᆞ니엇거제石壕村이武陵桃源되엿ᄂᆞᆫ가竹院松牕애絃誦聲을이어거ᄂᆞᆯ綠楊亭畔애擊壤歌음불러ᄂᆡ니無懷氏젹사람인가葛天氏ᄯᆡ百姓인가唐虞盛時을오ᄂᆞᆯ다시본ᄃᆞᆺᄒᆞ다許多好訟輩ᄂᆞᆫ어드러로다간게오獄訟이止息ᄒᆞ니囹圄空虛ᄒᆞ단말가民心이感化ᄒᆞ야졀노졀노그러토다必也使無訟을千載下애보아고야公庭이無事ᄒᆞ니村落도일이업다多少行人은男女分明異路ᄒᆞ고西疇處處에耕者讓畔ᄒᆞᄂᆞᆫ괴야뭇노라布穀아이ᄯᆞ히어ᄃᆡ오어즈버이몸이周界예드러온ᄃᆞᆺ相國風化아ᄆᆡ도그지업ᄂᆡ召公의德化늣겨寇君一年빌고제라嶺南士民들아이내말삼仔細듯소相國恩德을못니즐ᄒᆞᆫ닐ᄒᆞᄉᆡ齊紈를만히사고眞彩를가초어더相國風度를司馬溫公畫像갓치無限無限그려ᄂᆡ야嶺南千萬家애壁上의부쳐두고中心에그리온적이어든보ᄋᆞᆸ고쟈ᄒᆞ노라
蘆溪歌
编辑白首에訪水尋山太晩ᄒᆞᆫ줄알전마ᄂᆞᆫ平生素志를벱고야말랴너겨赤鼠三春에春服을새로닙고竹杖芒鞋로蘆溪깁흔골ᄋᆡᄒᆡᆼ혀마참차ᄌᆞ오니第一江山이님ᄌᆡ업시ᄇᆞ려ᄂᆞ다古往今來예幽人處士들이만히도잇것마ᄂᆞᆫ天慳地秘ᄒᆞ야ᄂᆞ를주랴남겨ᄯᅥᆺ다躕躇良久타가夕陽이거읜적의陟彼高岡ᄒᆞ야四隅로도라보니玄武朱雀과左右龍虎도그린ᄃᆞᆺ시ᄀᆞ잣고야山脈ᄆᆡᆺ친아ᄅᆡ藏風向陽ᄒᆞᆫᄃᆡ靑蘿ᄅᆞᆯ허혀드러數椽蝸室을背山臨流ᄒᆞ야五柳邊에디어두고斷岸千尺이가던龍이머무ᄂᆞᆫᄃᆞᆺ江頭에둘렷거늘草草亭ᄒᆞᆫ두間을구름ᄯᅴᆫ긴솔아ᄅᆡ바휘디켜여러ᄂᆡ니千態萬狀이아마도奇異코야峯巒은秀麗ᄒᆞ야富春山이되야잇고流水ᄂᆞᆫ盤回ᄒᆞ야七里灘이되야거든十里明沙ᄂᆞᆫ三月눈이되엿ᄂᆞ다이湖山形勝은견졸ᄃᆡ뇌야업ᄂᆡ巢許도아닌몸애어ᄂᆡ節義알리마ᄂᆞᆫ偶然時來예이名區임ᄌᆡ되여靑山流水와明月淸風도말업시절로절로어즈러온鷗鷺와數업ᄉᆞᆫ麋鹿도갑업시절로절로沮溺가던묵은밧과嚴子陵의釣臺도갑업시절로절로山中百物이다절로己物되니子陵이둘이오沮溺이서히로다어즈버이몸이아마도怪異코야入山當年에隱君子되얏ᄂᆞᆫ가千古芳名을이ᄒᆞᆫ몸애傳토고야人間의이일홈이人力으로일윌소냐山川이靈異ᄒᆞ야도아ᄂᆡᆫ가너기로라中心이瑩然ᄒᆞ야世慮절로그처디니光風霽月이腔子裏예품엇ᄂᆞᆫᄃᆞᆺ浩然眞趣날로새롭ᄒᆞ노왜라飛禽走獸ᄂᆞᆫ六畜이되얏거ᄂᆞᆯ달알ᄋᆡ괴기낙고구ᄅᆞᆷ속의밧흘가라먹고못나마도그칠적은업노왜라無盡ᄒᆞᆫ江山과許多ᄒᆞᆫ閑田은分給子孫ᄒᆞ려이와明月淸風은논ᄒᆞ듀기어려올ᄉᆡ才與不才예養志ᄒᆞᄂᆞᆫ아ᄃᆞᆯᄒᆞᆫ아太白淵明證筆에永永別給ᄒᆞ렷로라내의이말이迂闊ᄒᆞᆫᄃᆞᆺᄒᆞ것마ᄂᆞᆫ爲子孫計ᄂᆞᆫ다만인가너기로라ᄯᅩ어린이몸은仁者도아니오智者도아니로ᄃᆡ山水에癖이이러늘글ᄉᆞ록더욱ᄒᆞ니져貴ᄒᆞᆫ三公과이江山을밧골소냐어리미친이말을우으리도하렷마ᄂᆞᆫ아므리우어도나ᄂᆞᆫ됴히너기노라ᄒᆞ믈며明時예ᄇᆞ린몸이ᄒᆞ올닐이아조업서世間名利란ᄯᅳᆫ구ᄅᆞᆷ본덧ᄒᆞ고無思無慮ᄒᆞ야物外心만품고이셔이ᄂᆡ生涯을山水間의부텨두고春日이채긴제낙ᄃᆡ를비기쥐고葛巾布衣로釣臺예건너오니山雨ᄂᆞᆫ잠ᄭᅡᆫ개고大陽이ᄶᅬ오ᄂᆞᆫᄃᆡᄆᆞᆯ근바람더ᄃᆡ오니鏡面이더옥발다김흔돌이다보이니괴기數를알리로다괴기도나치이거놀ᄂᆡᆯ줄모ᄅᆞ거든차마엇디낙글넌고罷釣徘徊ᄒᆞ며波心을구어보니雲影天光은얼희여ᄌᆞᆷ겨ᄂᆞᆫᄃᆡ魚躍于淵을구ᄅᆞᆷ우ᄒᆡ보아고야하문득驚怪ᄒᆞ야俯察仰觀ᄒᆞ니上下天이宛然ᄒᆞ다一陣東風에긔엇진漁笛이놉히부러보ᄂᆡ던고江天이寥寂ᄒᆞᆫᄃᆡ반가와도들리ᄂᆞ다臨風倚杖ᄒᆞ야左右로도라보니臺中淸景이아마도蕭灑코야물도하ᄂᆞᆯ갓고하ᄂᆞᆯ도물갓ᄒᆞ니碧水長天은ᄒᆞᆫ빗티되얏거든물가애白𩿨ᄂᆞᆫ오ᄂᆞᆫᄃᆞᆺ가ᄂᆞᆫᄃᆞᆺ긋칠줄을모ᄅᆞᄂᆞ다巖畔山花ᄂᆞᆫ錦繡屛이되야잇고澗邊垂楊은草綠帳이되야거든良辰佳景을내혼자거ᄂᆞ리고正値花時를虛度치밀냐너겨아희불너하ᄂᆞᆫ말ᄉᆞᆷ이深山窮谷애海錯이야보로소냐살진고사리香氣ᄒᆞᆫ當歸草를猪脯鹿脯相間ᄒᆞ야크나큰細柳笥애洽足히다마두고鮒魚膾初味예訥魚生雉서거구어빗빗치드리거든瓦樽에白酒를박잔의가득부어ᄒᆞᆫ잔ᄯᅩᄒᆞᆫ잔醉토록먹은後에桃花ᄂᆞᆫ紅雨되야醉面에ᄲᅮᆯ리ᄂᆞᆫᄃᆡ苔磯너븐돌애놉히베고누어시니無懷氏적사ᄅᆞᆷ인가葛天氏ᄯᆡ百姓인가羲皇盛時를다시본가너기로라이힘이뉘힘고聖恩이아니신가江湖애물너신들憂君一念이야어ᄂᆡ刻애이ᄌᆞᆯᄂᆞᆫ고時時로머리드러北辰을ᄇᆞ라보고ᄂᆞᆷ모ᄅᆞᄂᆞᆫ눈물을天一方의디이ᄂᆞ다一生애품은ᄯᅳᆺ을비옵ᄂᆞ다하ᄂᆞ님아山平海渴토록우리聖主萬歲소셔煕皥世界예三代日月빗취소셔於千萬年에兵革을쉬우소셔耕田鑿井에擊壤歌를불리소셔이몸은이江山風月에늘글주를모ᄅᆞ로라
五倫歌
编辑父子有親
编辑아비ᄂᆞᆫ나ᄋᆞ시고어미ᄂᆞᆫ치옵시니昊天罔極이라갑흘길이어려우니大舜의終身誠孝도못다한가ᄒᆞ노라
人生百歲中에疾病이다이시니父母를섬기다몃ᄒᆡ를섬길넌고아마도못다ᄒᆞᆯ誠孝를일즉벼퍼보렷로라
父母섬기기를至誠으로셤기리라鷄鳴에盥漱ᄒᆞ고燠寒을믓ᄌᆞ오며날마다侍側奉養을沒身不衰ᄒᆞ오리라
世上사ᄅᆞᆷ들아父母恩德아ᄂᆞ산다父母곳아니면이몸이이실소냐生死葬祭예禮로ᄡᅥ終始갓게섬겨서라
三千罪惡中에不孝애더니업다夫子의이말ᄉᆞᆷ萬古애大法삼아아모려下愚不移도밋처알게ᄒᆞ렷로라
君臣有義
编辑聖恩이罔極ᄒᆞᆫ줄사ᄅᆞᆷ들아아ᄂᆞᄉᆞᆫ다聖恩곳안니면萬民이살로소냐이몸은罔極ᄒᆞᆫ聖恩을갑고말려ᄒᆞ노라
稷契도안닌몸애聖恩도罔極ᄒᆞᆯ샤百번을죽어도갑흘닐이업것마ᄂᆞᆫ窮達이길이달나못뫼압고설웟로라
사ᄅᆞᆷ삼기실제君父갓게삼겨시니君父ㅣ一致라輕重을두로소냐이몸은忠孝두사이예늘글주를모ᄅᆞ보라
深山의밤이드니北風이더옥차다玉樓高處에도이ᄇᆞᄅᆞᆷ부ᄂᆞᆫ게오긴밤의치우신가北斗비겨바ᄅᆡ로라
이몸이죽은後에忠誠이넉시되야놉히놉히ᄂᆞ라올라閶闔을블너열고上帝ᄭᅴ우리聖主를壽萬歲케비로리라
夫婦有別
编辑夫婦ㅣ이신後에父子兄弟삼겨시니夫婦곳아니면五倫이가즐소냐이中에生民이비롯ᄒᆞ니夫婦크다ᄒᆞ로라
사람내실적의夫婦ᄀᆞᆺ게삼겨시니天定配匹이라夫婦ᄀᆞᆺ치重ᄒᆞᆯ소나百年을아적삼아如鼓瑟琴ᄒᆞ렷로라
夫婦을重타ᄒᆞᆫᄃᆞᆯ情만重케가질것가禮別업시居處ᄒᆞ며恭敬업시조ᄒᆞᆯ소냐一生애敬待如賓을冀缺갓치ᄒᆞ오리라
夫婦삼길적의하重케삼겨시니夫唱婦隨ᄒᆞ야一家天地和ᄒᆞ리라날마다擧顏齊眉을孟光ᄀᆞᆺ게ᄒᆞ여라
남으로삼긴거시夫婦ᄀᆞᆺ치重ᄒᆞᆯ넌가사ᄅᆞᆷ의百福이夫婦에가잣거든이리重ᄒᆞᆫᄉᆞ이에아니和코엇지ᄒᆞ리
兄弟有愛
编辑兄弟내실적의同氣로삼겨시니骨肉至親이兄弟ᄀᆞᆺ치重ᄒᆞᆯ넌가一生애友愛之情을ᄒᆞᆫ몸ᄀᆞᆺ치ᄒᆞ리라
爭財예失性ᄒᆞ야同氣不睦마라ᄉᆞ라田地와奴婢ᄂᆞᆫ갑슬주면살련이와아모려萬金인들兄弟살ᄃᆡ잇ᄂᆞ냐
友愛를尤篤ᄒᆞ야百年을ᄒᆞᆫᄐᆡ살며ᄒᆞᆫ옷ᄒᆞᆫ밥을논하닙고논하먹고白髮애아뮈줄모ᄅᆞ도록ᄒᆞᆷ긔늘쟈ᄒᆞ노라
同氣로셋몸되야ᄒᆞᆫ몸가치지ᄂᆡ다가두아은어ᄃᆡ가셔도라올줄모ᄅᆞᄂᆞᆫ고날마다夕陽門外예한숨계워ᄒᆞ노라
友愛깁흔ᄯᅳ지表裏업시ᄒᆞᆫᄯᅳᆺ되야이中에和兄弟를우린가너겨ᄯᅥ니엇지라白首隻鴈이혼자울줄알리오
朋友有信
编辑벗을사괼딘ᄃᆡᆫ有信케사괴리라信업시사괴며恭敬업시지ᄂᆡᆯ소냐一生애久而敬之을始終업게ᄒᆞ오리라
言忠行篤ᄒᆞ고벗사고기삼가오면내몸애辱업고외다ᄒᆞ리적거이와진실로삼가지못ᄒᆞ면辱及其親ᄒᆞ오리라〈三章缺〉
總論
编辑天地間萬物中에사ᄅᆞᆷ이最貴ᄒᆞ니最貴ᄒᆞᆫ바ᄂᆞᆫ五倫이아니온가사ᄅᆞᆷ이五倫을모ᄅᆞ면不遠禽獸ᄒᆞ리라
幸茲秉彝心이古今업시다이실ᄉᆡ爰輯舊聞ᄒᆞ야二三篇지어시니嗟哉後生들아살펴보고힘서ᄒᆞ라
仔細히살펴보면뉘아니感激ᄒᆞ리文字ᄂᆞᆫ拙ᄒᆞ되誠敬을삭여시니진실로熟讀詳味ᄒᆞ면不無一助ᄒᆞ리라
辛酉秋。與鄭寒岡浴于蔚山椒井。
编辑神農氏모ᄅᆞᆫ藥을이椒井의숨겨던가秋陽이ᄶᅬ오ᄂᆞᆫᄃᆡ물속의잠겨시니曾點의浴沂氣像을오ᄂᆞᆯ다시본덧ᄒᆞ다
紅塵에ᄯᅳ지업셔斯文을닐을삼아繼往開來ᄒᆞ야吾道을발키시니千載後晦菴先生을다시본덧ᄒᆞ여라
立巖時旅軒張先生寓居本郡北立巖。公嘗從遊。代旅軒作此歌。
编辑無情히서ᄂᆞᆫ바회有情ᄒᆞ야보이ᄂᆞ다最靈ᄒᆞᆫ吾人도直立不倚어렵거ᄂᆞᆯ萬古애곳게선저얼구리고칠적이업ᄂᆞ다
江頭에屹立ᄒᆞ니仰之예더옥놉다風霜애不變ᄒᆞ니鑽之예더옥긋다사람도이바회ᄀᆞᆺᄒᆞ면大丈夫ᅟᅵᆫ가ᄒᆞ노라
卓然直立ᄒᆞ니法바담즉ᄒᆞ다마ᄂᆞᆫ구ᄅᆞᆷ깁흔峽中에알리잇사ᄎᆞ자오랴努力躋攀ᄒᆞ면奇觀이야만ᄒᆞ니라
精舍
编辑草屋두세間을巖穴에부쳐두고松竹두빗치病目애익어시니이中에春去秋來를아므젠줄모ᄅᆞ로다
起予巖
编辑夫子의起予者ᄂᆞᆫ商也라드러더니오ᄂᆞᆯ起予者ᄂᆞᆫ말업ᄉᆞᆫ바회로다어리고鄙塞던미암이절로새롭ᄒᆞᄂᆞ다
戒懼臺
编辑戒懼臺올라오니믄득졀로戰兢ᄒᆞ다臺上애살펴보며이ᄀᆞᆺ치저홉거든못보고못듯ᄂᆞᆫᄯᅡ히야아니삼가엇지ᄒᆞ리
吐月峯
编辑峯頭에소슨ᄃᆞᆯ이이山中의비취노다九萬里長天이멀고도놉건마ᄂᆞᆫ高山이揷天ᄒᆞ니돌우흐로나ᄂᆞᆫ덧다
九仞峯
编辑巍巍ᄒᆞᆫ九仞峯이衆山中에秀異코야下學工程이이山하기갓건마ᄂᆞᆫ엇디라이제爲山은功虧一簣ᄒᆞᄂᆞᆫ게오
小魯岑
编辑南魯岑이일홈을뉘라서지은게오夫子登臨도이東山아니런가萬古靑山이只麽히놉하시니아모ᄃᆡᆫ줄모ᄅᆞ로다
避世臺
编辑名利예ᄯᅳ지업서ᄇᆡ오ᄉᆡ막ᄃᆡ집고訪水尋山ᄒᆞ야避世臺예드러오니어즈버武陵桃源도여긔런가ᄒᆞ로라
合流臺
编辑合流臺ᄂᆞ린물이보기예有術ᄒᆞ다彼此업시흘러가고左右에逢源ᄒᆞ니分時異合處同을이臺下애아라고야
尋眞洞
编辑尋眞洞ᄂᆞ린물이巖下애구븨지어不舍晝夜ᄒᆞ야亭子압ᄒᆡ드러오니어즈버洛水伊川을다시본ᄃᆞᆺᄒᆞ여라
採藥洞
编辑솔알ᄋᆡ아ᄒᆡ들아네얼운어ᄃᆡ가뇨藥ᄏᆡ러가시니ᄒᆞ마도라오렷마ᄂᆞᆫ山中에구룸이겁후니간곳몰라ᄒᆞ노라
浴鶴潭
编辑浴鶴潭ᄆᆞᆯ근물에鶴을조차沐浴ᄒᆞ고訪花隨柳ᄒᆞ야興을ᄐᆞ고도라오니아무려風乎舞雩詠而歸ᅟᅵᆫ들블을일이이시랴
數魚淵
编辑淵泉이하말그니가ᄂᆞᆫ고기다보닌다一二三四를낫낫치혜리로다童子야새물에고기를다시헤여보아라
響玉橋
编辑磯頭에누엇다가ᄭᆡᄃᆞ라니ᄃᆞᆯ이ᄇᆞᆯ다靑藜杖빗기집고玉橋를건너오니玉橋애ᄆᆞᆯ근소ᄅᆡ를자ᄂᆞᆫ새만아놋다
釣月灘
编辑낙대를빗기쥐고釣月灘ᄇᆞ라ᄂᆞ려불근역귀헤혀ᄂᆡ고ᄃᆞᆯ알ᄋᆡ안ᄌᆞ시니아모려桐江興味ᅟᅵᆫᄃᆞᆯ불을주리이시랴
耕雲野
编辑沮溺의가던밧치千年을묵어거ᄂᆞᆯ구ᄅᆞᆷ을허혀드러두세이렁가라두고生涯를足다사ᄒᆞᆯ가마ᄂᆞᆫ부ᄅᆞᆯ거ᄉᆞᆫ업노왜라
停雲嶺
编辑停雲嶺ᄇᆞ라보니天中에두렷괴야陟彼崔嵬ᄒᆞ면五雲蓬萊보련마ᄂᆞᆫ病目애눈물이얼ᄒᆡ니바ᄅᆡ보기아득ᄒᆞ다
産芝嶺
编辑産芝嶺올나오니一身이香氣롭다四皓商山도이芝嶺아니런가山路애구룸이깁흐니아모ᄃᆡᆫ줄모ᄅᆞ로다
隔塵嶺
编辑隔塵嶺하놉흐니紅塵이머러간다ᄀᆞᆺ득이먹은귀싯슬ᄉᆞ록먹어가니山밧긔是是非非를듯도보도못ᄒᆞ로다
畫裏臺
编辑江上山ᄂᆞ린긋ᄒᆡ솔아ᄅᆡ너분돌해翠嵐丹霞ㅣ疊疊이둘러시니어즈버雲母屛風을ᄀᆞᆺ그린ᄃᆞᆺᄒᆞ여라
思親
编辑霜露旣降ᄒᆞ니ᄇᆞᆯ기도悽愴코야이옷시열다ᄒᆞ야치위저허그러ᄒᆞ랴一生애永慕方寸의문득늣겨ᄒᆞ로라
慕賢
编辑반가올샤오ᄂᆞᆯᄭᅮᆷ에首陽隱士보완제고正色愀然ᄒᆞ고날ᄃᆞ려ᄒᆞᄂᆞᆫ말ᄉᆞᆷ至今에叩馬ᄒᆞ던忠義를못ᄂᆡ이져ᄒᆞ더라
汨羅ᄂᆞ린물이靈均의怨淚로다爲國忠憤을넉시라도못내이저至今에嗚咽波聲이어제론ᄃᆞᆺᄒᆞ얏ᄂᆞ다
蘆洲幽居
编辑어화아ᄒᆡ들아후리치고가자ᄉᆞ라田園이뷔엇거니엇지아니가로소냐道川上明月淸風이날기ᄃᆞ리기오ᄅᆡ니라
自警
编辑明鏡에틔ᄶᅵ거던갑주고닷글줄아희어룬업시다밋쳐알건마ᄂᆞᆫ갑업시닷글明德을닷글줄을모ᄅᆞᄂᆞ다
誠意關도라드러入德門ᄇᆞ라보니크나큰ᄒᆞᆫ길이넙고도곳다마ᄂᆞᆫ엇지라盡日行人이오도가도아닌게오
九仞山긴슬베혀濟世舟를무어ᄂᆡ야길닐흔行人을다건ᄂᆡ려ᄒᆞ엿더니사공도無狀ᄒᆞ야暮江頭에ᄇᆞ렷ᄂᆞ다