翻譯:惡之華/傲慢嘅報應

傲慢嘅報應
作者：夏爾·皮耶·波德萊爾
譯者：木枚

本作品收錄於《Translation:惡之華》

喺呢個美好嘅時代，
神學充滿朝氣盛開。
聽講有日有個博士學識最廣，
佢夾硬攻破冷若冰霜嘅心房，

喺深淵中將佢哋撩撥，
引向嘅靈道光明廣闊，
條路佢自己都唔太清楚，
或者只係得聖靈先嚟過，
佢好似啲人爬得太高被嚇壞，
喺魔鬼般嘅傲慢中忘我大嗌:
「聖嬰啊聖嬰，我將你高舉，
但如果我進犯你盔甲嘅空虛，
你嘅恥辱就會同榮耀一樣多，
不折不扣成為可笑嘅細路哥。」

話音未落，佢失去咗自製，
有層紗隔開太陽嘅光輝，
混沌喺佢個腦唔再隱蔽，
曾經活生生嘅神廟，井然華麗，
華蓋下歡宴之盛難計。
當靜默同黑夜喺佢其內依棲，
宛如喺不得其門而入嘅墓位。
自此佢睇落似禽獸喺路際，
當佢離開，目空一切，
越過田地，不分四季，
邋遢冇用又醜陋，如事物作廢，
呢個笑柄，專為細路帶嚟快慰。