翻譯:惡之華/陽光

陽光
作者：夏爾·皮耶·波德萊爾
譯者：木枚

本作品收錄於《惡之華》

老舊街道兩旁，百葉窗掛喺爛屋，
藏匿住不為人知嘅肉慾，
當變本加厲惡毒嘅太陽，
普照喺都城、田地、屋頂同麥田上，
我會喺路上獨自練習精湛劍術，
上下求索，搵靈光一閃嘅格律，
好似喺石仔路噉，喺文字上跌撞，
有時就撞著一直夢寐以求嘅詩行。

呢個再生父母驅除疫病，
喺花田將詩句當玫瑰噉喚醒。
佢叫世上嘅憂慮消散到天日，
再往頭殼同蜂巢灌滿蜜。
佢叫拄杖嘅返老還童、
喜樂悅目，似少女面容，
不滅嘅心靈渴望繁花加增，
喺佢麾下都五穀豐登!

當佢好似詩人噉臨到，
凡卑下嘅，都升為高，
佢似皇袍加身，唔帶隨從，
靜靜親臨天下嘅病榻同王宮。