臺省民主歌

臺灣民主歌
佚名
1897年

〈臺灣民主歌〉，又稱〈臺省民主歌〉，是記述臺灣民主國興亡的白話文學作品，以閩南語老泉音為創作方言。此歌現存六種版本，本文以上海點石齋書局出版的《臺省民主歌》（光緒丁酉年 (1897)秋鎸）為主。

說出清國一条代，　
邊出一歌唱出來，
臺灣事志天下知，
造起火車先出來。

新造火車行鐵枝，
無腳能行不真奇，
欽差設計思計致，
百姓聞名少念伊。

百般心神用一疼，
造起火車卜再人，
就看日子卜興工，
各位路頭設票房。

火車却客吹水螺，
卜放盡磅着添火，
大甲溪中造難過，
并無賢人可收尾。

欽差告老到家中，
壞伊手尾唐景松，
臺灣千軍萬馬將，
一時反背心奸雄。

鴻章東洋通日本，
卜征滿州光緒君，
在伊打算一半允，
望卜江山對半分。

說到京城李鴻章，
奸臣心肝真正雄，
本身朝內佐宰相，
何用甲伊去通商。

鴻章見用奸臣計，
去通日本打高麗，
返來朝中見皇帝，
五足港口著盡把。

光緒力話應鴻章，
乎伊打算免參詳，
每日朝中隨皇上，
無宜貝心無盡忠。

日本戦船挂銃空，
一時去打高麗港，
若無鴻章塊變弄，
世事亦免即大空。

第一高麗先打起，
本縣寫書投降伊，
高麗打了出告示，
雖時安民守地理。

高麗打了出外鄉，
卜打滿州之地場，
鴻章心內一下想，
子兒現在治東洋。

做番附馬李經芳，
鴻章朝內隨君王，
奸臣拐友双頭弄，
不怕日后去沉亡。

鴻章朝內有名聲，
通番串位真出名，
姓李經芳是伊子，
五月時節來交城。

日本好漢打汝順，
未曾出戦先行文，
說到京城光緒君，
水面並無一戦船。

淮軍鴻章親名字，
朝內無人過盤伊，
好呆盡望伊主意，
無宜貝心做一時。

日本塊通李鴻章，
前時后日有參詳，
起兵去征一必仲，
不免失了个刀傷。

高麗汝順伊打開，
亦是鴻章塊變鬼，
添起大隊過別位，
雖時打電來淡水。

鴻章心肝想倒秉，
假奏君王着倩兵，
楚軍腳手不通用，
盡用淮軍伊學生。

就奏君王卜去平，
朝內伐落着倩兵，
望卜成功來得勝，
無宜貝心即絕情。

鴻章朝內見皇帝，
卜去日本平高麗，
心肝想起有一計，
臺灣寫乎恰着脈。

君王心內有主意，
也免即謹做一時。
　　　　　　　　
　　　　　　　　

鴻章心內想計智，
暗寫蜜書去乎伊，
日本看見有主意，
雖時起兵來征伊。

皇帝一時有主意，
就去安南請劉義，
臺南下府尔主意，
臺北景松去料理。

戶尾交帶楊希賓，
圭隆朝棟也忠臣，
三条港腳有人鎮，
百般大志無要謹。

呵悔卜守戶尾港，
身中得病不知人，
倒落房中身世重，
日本未來過工空

十五騎馬去行香，
拔落馬腳在地場，
起來說話有絕樣，
想着伊某心肝娘。

黃潭官名是淮國，
去領撫臺个捧祿，
呵悔甲伊真無福，
死去二字真漲毒。

黃潭去守八里亭，
望卜功勞通上文，
無宜江山乎日本，
官兵着折免出軍。

日本去見李鴻章，
卜征臺灣唐景松，
卜獻江山還皇帝，
勞軍動將孤不終。

鴻章電報打過來，
撫臺城內雖時知，
稱呼日本真利害，
不久日子就能來。

日本也有著滿州，
戦船水面店地遊，
卜侢粮草袂過手，
有兵無粮㑂干休。

撫臺用計卜征番，
通知海防着設欵，
滿州此時塊反亂，
庫銀難得到臺灣。

海防一時有主意，
就叫頭人來相議，
說到海關个大志，
甲伊安館無延遲。

大局安落在地場，
庄中設出團練長，
就請練勇出外鄉，
卜共富戶借錢粮。

抽起練勇滿滿是，
未知練勇是在年？
鴻章滿州去寫字，
尾省臺灣寫乎伊。

臺灣寫乎是完俻，
就共日本說返枝，
保尔臺灣無事志，
雖時電報來通知。

撫臺得知請頭人，
一時抽兵下出港，
百姓紳士巢振動，
和心勸伊先不通。

下面黃甲探聽知，
帶起親兵就起來，
一時好漢入城內，
去到中落見撫臺。

撫臺煩好心無意，
坐落無話通應伊，
想起卜走袂得利，
先脫家后返鄉里。

一日電報直直到，
番船卜來鎮港口，
撫臺城內亂吵吵，
眾人卜扶伊做頭。

尾省頭人真不通，
封伊撫臺民主王，
未曾拉旂人就廣，
敢能為伊去沉亡！

四月城內出告示，
眾人迎印去交伊，
民主國號三大字，
山頭拉起百姓旂。

撫臺卜搬過省份，
就甲差官叫中軍，
就叫中軍來議論，
𤆬我家后落火船。

景松家后返家鄉，
送伊庫銀一百兩，
做人中軍敢返樣？
就共賊里細思量。

賊里聽說就得知，
手夯大刀就起來，
一時行到撫衙內，
就力中軍起來刣。

撫臺一時想的到，
一个賊里不通交，
中軍共我押家后，
乎伊殺死大路頭。

撫臺一時有主意，
隨時科遂去留伊，
衣裳籠箱扛未利，
雙平戦船卜生死。

文武官員全振動，
一時請令叫頭人，
望卜有工有所望，
兩平生死先不通。

頭人情理不敢倒，
聲聲句句着勸和，
百般盡着看旂號，
君王盡交恁伐落。

提台盡忠聽人勸，
雖時親兵吊倒返，
吩咐頭人着打算，
不通乎我走過庄。

五月廿九亂一場，
路邊茶客被人搶，
大局尼金茶無糧，
就看撫臺麼主張。

城內探知都淨淨，
無宜十三能敗兵，
恐了反亂未太平，
館內茶工全不揀。

李春食靠勢洋行，
雖時館內叫興工，
通庄茶工全叮動，
卜買夏茶逗秋香。

說到敗兵个代志，
撫臺个罪無塊擬，
貝心也免相通知，
透冥逃走做一時。

三月廿八刣中軍，
五月初五到番船，
海防電報打一困，
各州府縣着通文。

海防打電就來報，
撫臺城內着伐落，
粵底番船八十號，
統領營官心着和。

五月初五到臺灣，
基隆不倚佔塊冤，
卜拍后斗恰眷串，
來看城池百丈高。

一日戦船直直到，
山頂个兵亂抄抄，
來討救兵全無到，
各人心肝想着走。

初六日本扒上山，
官兵被伊一直赶，
來報基隆海防官，
被伊刣死有一半。

粵底上山刣一陣，
無宜敗兵來即謹，
金山个人知行情，
百姓般走當一面。

初七來到金仔山，
看見金空真有盤。
日本一時想心肝，
通山百姓一直趕。

初八番兵一直到，
想卜來打基隆頭，
百姓个人想不到，
想卜撫臺來做頭。

初九刣到基隆山，
八堵添兵卜去赶，
撫臺一時想心肝，
想卜抽兵恰有盤。

初十基隆陳大鏡，
第一反背廣東兵，
撫臺卜走塊想正，
害死官員真不明。

城內火車直直侢，
卜去基隆甲伊刣，
也無刣須三五擺，
透冥抽兵走落來。

撫臺用計卜返到，
透冥衙內放火灱，
城內庫銀八百號，
并無頭人通伐落。

撫臺逃走十二冥，
路漢欣喜着半天，
城內庫銀下鄭鄭，
那有福氣驚無錢。

一日無君天下亂，
一時中間全變欵，
番船未來人就斷，
乞丐路漢多得權。

十三城內全振動，
亦無一个是好人，
軍兵一時如葱葱，
並無一个是頭人。

說到敗兵个代志，
圭隆有物無人遲，
眾人苦走不得利，
錢銀恰多是卜年。

營盤府縣外江人，
河南安徽配廣東，
城內官兵走空空，
通庄卜搶外江人。

圭庄富戶真存長，
番仔未來先禁庄，
盡驚土匪个亂穿，
雖時買料造隘門。

撫臺逃走過別省，
庄中賊馬五路興，
手帶短刀手夯銃，
乎伊搶去真不明。

通庄土匪葉葉是，
天地卜變做一時，
眾人打羅夯家司，
囝仔大小驚半死。

冥日亂搶搬不盡，
眾庄塊搶真可人，
舖戶相議卜立稟，
去請日本來安民。

日本來到雖時凈，
驚了人家有住兵，
卜去巡查手夯銃，
一間看了過別間。

十二安民水返腳，
街頭巷尾佔塊查。
　　　　　　　　
　　　　　　　　

和記李春告番势，
日本來打當買茶，
夏茶今年大好計，
那卜趁錢盡二下。

日本剃頭成和尚，
番王坐殿在東洋，
清朝敗兵人亂搶，
各府縣官返家鄉。

五月反亂真好看，
臺灣一省尋無官，
五路官兵通走散，
城內軍宗眾人搬。

光緒坐天巳未年，
東洋日本來爭伊，
想着臺灣大子利，
即久無打待時年。

今年光緒大落難，
誅着日本佔江山，
百姓逃走真千難，
下天下地求平安。

十四番仔到錫口，
無宜大兵一直到，
等待十四二更后，
卜去城內通做頭。

去到番楼塊安營，
遇着一人施良兄，
為人正直都不驚，
十五早起𤆬入城。

日本入城未幾時，
就叫良兄倩戈里，
卜倩龜里滿滿是，
一時扛米無延遲。

此時反亂未平定，
基隆先設民主廳，
力着土匪無性命，
力着好人通來領。

圭良到城有五步，
水返腳圭一半路，
一日卜行真千苦，
此去卜設司令部。

總督一日直入城，
城內敢着設縣廳？
　　　　　　　　
　　　　　　　　

日本入城未几時，
后面再來是戈里。
　　　　　　　　
　　　　　　　　

不少日本脫庫生，
赤身路傦一時間，
力人雞鴨滿六萬，
正人看見驚甲瘦。

呆人好漢配粮草，
約首入呈稟回頭，
日本战兵一直到，
一時京死抽塊走。

富戶差人就去叫，
着共日本會得着，
日本來到下下趙，
卜力呆人放火燒。

庄中呆人一下凈，
呆人出來着招兵，
通庄差人塊買銃，
卜搶戈里日本兵。

庄中甲人着想起，
卜做只事着看時，
日本个頭極呆剃，
頂港有人過盤伊。

庄中全然無頭棕，
看尔个人真格空，
招軍買馬帶塊弄，
看尔姓命誥省人。

卜打日本后斗抄，
看無真主通做頭，
下面劉義也未到，

庄中全來無頭棕，
卜爭日本先不通，
枋橋有錢不振動，
甲伊通商好做人。

盡忠報國林朝棟，
第一京死林國芳，
日本未來想甲狂，
京了家伙着充公。

下面少爺陣陣到，
第一京死枋橋頭，
就叫掌柜故庄頭，
本身家后𤆬塊走。

日本軍兵直直到，
有人趁錢塊𤆬抄，
出來庄中行透透，
甲人軍宗着去交。

暗坑个人真呆望，
七月初五卜來攻，
日本城頂安大貢，
庄中打買追軍宗。

趁番下食葉葉示，
路追在來不示時，
一着小本甲大利，
相招共伊做戈里。

卜倩戈里在地人，
論真起來先不通，
五路官兵那叮動，
乎伊力去撻銃空。

一条姓命歸陰司，
下海城隍有出名，
今年反亂未平定，
正庄弟子不敢迎。

頂年通庄現由景，
五月十三小文明，
今年十三那者凈，
亦是反亂未太平。

每年迎來北門內，
亦有牙妲共采排，
今年亦示番仔害，
正庄弟子不敢來。

五月十三關公會，
城隍廟前典手花，
賞尔戇內那敢賣，
手夯銅針插嘴脴。

永時正音難般戲，
日本未來銓家司，
籐排鳥銃葉葉示，
今年乖巧無半枝。

本街采排牙妲唱，
眾人成心來隨香，
奸目公子野和尚，
車古男人假姿娘。

廟內拔杯着点淺，
保庇弟子大趁錢，
今年被着反亂大，
共伊寬限落下年。

勸人閑話不可聽，
秋秋塊念卜攻成，
其實此情都無影，
通庄大小巢巢京。

卜打成內都用意，
可惜有兵無銃子，
用計寫批假劉義，
眾庄頭人去揀伊。

總督雖時起大隊，
四散戦兵吊做追，
呆人賢廣白賊嘴，
害人搬走真克開。

日本物件葉葉示，
路透科落不利時，
一着小本甲大利，
相招共伊做戈里。

第一丰臣日本兵，
臺灣通通報太平，
番王欣喜真得勝，
呵咾總督有才情。

頂年德國打基隆，
亦無今年走即空，
撫臺逃走罪卦重，
克開百姓無賢人。

頭人伸士真良貝，
來倚撫臺真卜疏，
望卜掛伊做元帥，
無宜此事來獻花。

撫臺反貝放伊須，
克開百姓尋無主，
那卜盡忠甲伊誅，
百姓也免即六無。

光緒落難乙未年，
冬洋日本卜來征，
那無奸臣來亂變，
甲伊亂刣也有偏。

一時安淨無土匪，
正庄頭人心就開，
下日那有到大隊，
食人仁家真到水。

城內縣官到錫口，
眾人入稟來經投，
出來人家抄透透，
害人搬走亂抄抄。

日本那有手了賤，
去北媽祖个丕肩，
此時反亂真無變，
眾人看見真了然。

冬洋日本真無樣，
巢撻人家个姿娘，
長官極伊出外鄉，
眾人欣喜打手掌。

采舍帶在錫口后，
算來庄中第一頭，
日本大隊一下到，
守俻公館安伊兠。

稟內也無伊名字，
明明也示伊注死，
日本追赶走無利，
無人出頭敢救伊。

喬先做人極呆鉄，
呆人即敢去搶伊，
林買看見叫鳴微，
冤仇有報真欣喜。

喬先受氣神聖稟，
力去城內見火神，
眾圭圖記來保認，
卜鎮林買罪者輕。

喬先當堂去對只，
林買黨人去搶伊，
稟尔逃兵个代志，
此情無影屈天里。

廿一埤角來起致，
想無六空搶戈里，
總督城內塊受氣，
雖時點兵去征伊。

五路假批通暗坑，
卜攻城內初六冥，
溪州炙林佔甲鄭，
城內號頭凈青青。

可惜一人佔一位，
放尿超沙沒做堆，
那無通庄來法水，
打伊城內難得開。

日本官兵無外多，
可惜正人不和齊，
無頭公案不通做，
也免通庄吵人蛙。

買銃令人真好胆，
出來溪州佔炙林，
那無頭人出來罵，
世事恰大咸丰三。

日本个兵賢排陣，
陣圖百姓看不真，
日本番兵極好認，
甲伊亂刣無要謹。

五路通枇行透透，
着看下面个號頭，
只時氣力用無到，
可惜有兵無粮草。

三甲永庄塊抽分，
呆人貝心報日本，
總督縣聽有議論，
雖時點兵卜去巡。

日本卜去力抽分，
百姓會齊搶伊船，
双平起兵刣一困，
并無戦書相尊𢙨。

一時走入座部內，
百姓四面為塊刣，
頭日五百去戦敗，
伸無五十通返來。

廿五豈事三角永，
通庄打羅討救兵，
頭人督陣手夯令，
望卜日后有功名。

說到頂港个名姓，
頭人紳士真半丁，
亦無賊案共人命，
一時般走過別省。

光緒日止再紅須，
眾人請叫伊才情，
平洋世界真好用，
日本手頭了光名。

日本打開三角永，
百姓不和即敗兵，
有人偷去探行情，
返來那想就那呤。

也示無主來所致，
百姓虔心放乎伊，
收軍返來食自己，
營中粮草無半絲。

一時打開一个散，
囝仔大水去帶山，
日本通上吵甲難，
力去城內見火官。

豈先塊靠峇葉山，
甲伊相刣真有盤，
招兵出來乎伊看，
無宜乎伊連片趕。

清水祖師力生同，
眾庄弟子看光窓，
日本排陣火蜈蚣，
放火燒厝不見人。

廿六早起興大隊，
用計排陣打者開，
呆人刣須走別位，
克開百姓死歸堆。

廿八西盛來豈到，
相招來走放乎伊。

戈里走入府城內，
總督縣廳全全知，
掃官千總都凡在，
雖時點兵卜去刣。

日本來到新庄圭，
一時扳搭柴粮底，
招着官兵示在地，
身穿衣裳短庫蛙。

有人塊走亦未利，
謹謹寫書投降伊，
在地官兵都不示，
外庄作事來類伊。

新庄山頂龍潭陂，
廿一法水仝日子，
囝仔大水走不利，
全家个人巢巢死。

日本見打幾所在，
也示百姓甲伊刣，
被伊燒去八十擺，
并無真主通出來。

見燒地頭多凈凈，
日本一時就收兵，
返到城內真正凈，
出了告示去安民。

日本安民未幾時，
就說釆金一代志，
平生个人真硬氣，
無宜盡忠歸行伊。

雖時打掃大廳堂，
就倩人工煎茶湯，
一家大小環環返，
望卜做官有久長。

日本叫伊來相議，
次子文乾第有義，
領兵臺南平劉義，
返來正人皆恭喜。

眾人賀戲真示清，
八仙綉釆番仔燈，
看戲个人一大陣，
每冥叫人食點心。

戲今搬了都完俻，
遇着天頂降呆星，
詹振招兵真敢死，
釆舍招人去力伊。

等待十一月中時，
十六冥中起代志，
通到山賊滿滿示，
卜打日本無延遲。

詹振一人夯烏令，
卜管山賊土匪兵，
就來過港安大銃，
卜打日本真清榮。

十六冥中四點鐘，
詹振號頭放大銃，
日本官兵無路用，
未刣半陣就退兵。

虧得采舍真受苦，
大厝燒了成平埔，
好得許年𤆬伊路，
走去搭攸透冥摸。

十七早起刣戈里，
錫口眾庄全罷市，
看見火車來到只，
詹振點兵去征伊。

火車返去多得知，
總督點兵就起來，
無宜一陣就來敗，
去搶飯員扛返來。

詹振个兵真示𣮛，
水返腳圭就點兵，
來到錫口接一陣，
無宜敗兵來者荳。

日本敗兵一下走，
無宜粧后設后抄，
來到南港大橋頭，
被伊刣死就來走。

十七早起著塊刣，
日本落難無人知，
敗陣走入府城內，
通城个番流目滓。

且到十八早起時，
日本官兵思計致，
火車大銃就再起，
再來錫口無延遲。

土匪一時想不到，
城內無開就無頭，
叫起火車一不到，
人人多示想卜走。

詹振厝在五份埔，
招軍買馬成土匪，
想卜打開有功勞，
無宜錫口成平埔。

錫口查某罵一疼，
詹振狗拖不示人，
無頭公案先不通，
害人無厝罪掛重。

借問只歌乜仁騙，
正是曉神良君先。