翻译:恶之华/我从深处向你求告

我从深处向你求告
作者：夏尔·皮耶·波德莱尔
译者：木枚

本作品收录于《Translation:恶之华》

喺我心灵所堕入嘅漆黑深渊，
我唯一嘅爱啊，我求你怜悯，
呢个忧郁嘅宇宙畀地平线封印，
恐惧同亵渎喺夜晚兜转。

有六个月太阳冰冷，喺天上往复，
另外六个月黑夜将地上罩起，
呢个国度仲荒芜过极地，
无兽无河，无草无木。

但世上最恐怖嘅嘢莫过于此，
就系冰结嘅太阳残酷嘅寒意，
同似远古混沌嘅夜晚，永无止境。

我好妒忌最低贱嘅禽兽嘅宿命，
佢哋喺空洞嘅睡眠中沉溺，
然后岁月如织，悠悠开释。