翻譯:惡之華/你將全世界放喺你嘅床邊

你將全世界放喺你嘅床邊
作者：夏爾·皮耶·波德萊爾
譯者：木枚

本作品收錄於《惡之華》

你將全宇宙放喺你嘅床邊，
淫婦，無聊令你無法無天！
為咗喺呢個遊戲砥礪你嘅獠牙，
日日都要有個心臟擺喺飼料架。
你雙眼通明如窗櫥，
又恍似夜放花千樹，
對暫借嘅魅力不知御勒，
從來唔明白其美嘅法則。

副機器又聾又啞，滋長痛苦不絕，
件工具有益健康，豪飲世界嘅血。
你容顏漸頹唔覺得羞恥？
或者照鏡嗰陣唔會注意？

你以為你了解惡嘅偉大，
佢冇教你對恐怖要慎戒，
同時大自然將佢滿腹嘅陰謀隱藏，
再利用你呢個女人，罪孽嘅女王，
借你呢隻賤種，為將天才培養，

污穢中帶卓越，恥辱中帶高尚！