翻譯:惡之華/博弈

博弈
作者：夏爾·皮耶·波德萊爾
譯者：木枚

本作品收錄於《Translation:惡之華》

坐喺頹靡扶手椅上嘅老仕女，
畫眉白面，雙眼風騷，流淌禍水，
身態矯揉造作，自佢瘦耳一對，
寶石金屬碰撞聲碎。

綠色氈周圍，都係冇嘴唇嘅面
冇血色嘅嘴唇，冇牙嘅下巴，
手指帶業火嘅狂熱震顫，
喺空虛嘅袋同悸動嘅胸膛搜查。

一排弱光上嘅天花板藏污納垢，
大油燈將光澤射去
偉大詩人陰沉嘅額頭，
佢啱啱先至揮霍完狂野汗水。

呢度有個暗鬱場面，喺某晚夜幕，
我雪亮嘅雙眼喺夢入面睇住自己，
我身處靜默嘅巢穴嘅一角
托住手踭、發冷、沉默、妒忌，

妒忌啲人可以堅韌噉熱愛，
妒忌啲老雞有死蔭嘅歡鬧，
仲有任何人高興噉向我撲面而來，
一個就挾帶當年勇，一個就美貌!

我嘅心疲於妒忌咁多個可憐鬼，
佢哋狂奔向嘅深淵打緊喊露。
啲人滿身自己嘅血污，講到尾都係
要痛苦同地獄，都唔要死亡同虛無。