翻譯:惡之華/紅酒之魂
| ← | 撒旦嘅連禱文 | 紅酒之魂 作者：夏爾·皮耶·波德萊爾 譯者：木枚 |
拾荒者之酒 |
|
某晚，紅酒之魂喺樽入邊歌唱：
「人啊，親愛嘅你被剝奪繼承，
琉璃之獄同腥紅之臘喺我之上，
我要向你發出耀眼博愛嘅歌聲！
喺火光中嘅山岡，我知需要幾分
痛苦、汗水同灼熱嘅陽光
先可以令我誕生同賦我靈魂，
但我唔會不知感恩同邪惡狂妄。
因為當我從攰如牛馬嘅人嘅喉嚨
墜落時嘅喜悅大得不可方物，
佢暖熱嘅胸膛係座溫柔嘅墓塚，
我係嗰度開心過喺自己嘅斗室。
你有冇聽到禮拜日嘅副歌迴蕩
同喺我震顫嘅膛內囀鳴嘅希望？
你捲起袖，手踭喺枱上安放，
你予我榮光，然後自覺舒爽。
我點燃你快活嘅老婆兩眸，
給予你個仔力量同光華，
我會成為強化鬥士肌肉嘅油，
為咗呢位人生嘅脆弱運動家。
我會墮向你呢個不斷滋長嘅仙饈
同由不滅播種者拋擲嘅珍貴種子，
因為我哋嘅愛會賜予誕壽
畀如稀世之花綻向上帝嘅詩！
